French Open: Djokovic o Nadal na semifinal nung ajuruteptsü akok

Paris, May 20 (Agencies): Tebur World No. 1, Novak Djokovic aser taoba mapang French Open takok marok 9 tashi agizüksang, Rafael Nadal nati 2016 French Open tennis asayamong tebur singles semifinal nung ajuruteptsüsa tanü, Hokolbar nü asayatsüren lemzükogo.
French Open nung 4 buba jenjang abentsü jenjang angusang, Switzerland nunger Stan Wawrinka-ia 2 buba jenjang abener, Britain nunger Andy Murray den semifinal asayatsüsa asayatsüren lemzükogo.
Serbia nunger Djokovic-i par mezüngbuba asaya Taiwan nunger Lu Yen-Hsun den asayatsü lemzüka lir aser Spain nunger Nadal-ia Australia nunger Sam Groth den tetenzükba asaya asayatsü lemzükba osang jangjaogo.
Tetsür singles shilem nunga tetsür World No.1, America tsür, Serena Williams-i lar tetenzükba asaya Slovakia tsür, World No. 76, Magdalena Rybarikova den asayatsü lemzüka lir.
Ano külen, 2016 French Open asayamong nung shilem magitettsüsa akümba osang yashi, Brehostibar nü sangoktsüsang, Switzerland nunger Roger Federer sülen anidaka, France nunger Gael Monfils-ia tan asayamong nung shilem magitettsüsa akümba osang ka asayamong tayongeri tanü metetdaktsüogo.
“Tebur World No. 14, Monfils shirangba yong pai French Open nung shilem magitettsüsa akümba osang sangoktsür,” ta parnoki osang jangjashitsü.