May 27 nü WB CM atema Mamata tenangzükba agitsü

Kolkata, May 21 (Agencies): May 27, 2016 nü West Bengal Chief minister anabenren inyaktsü atema Mamata Banerjee tenangzükba agitsü, aser iba sentong nung adentsü atema Ato kilonser Narendra Modi, Bangladesh Ato kiloser aser Bhutan Ato kilonsertem densema tongtibang nisung aika jaokogo.
Mamata Banerjee CM atema tenangzükba agiba sentong nungsa Uttar Pradesh Chief Minister, Akhilesh Yadav, Delhi Chief minister, Arvind Kejriwal aser Rashtriya Janata Dal tongti lenir, Lalu Prasad Yadav nungera jaoka lir.
Honibarnü Trinamool Congress (TMC) lenir kati, “Iba sentong nung adentsü atema Modi den Bangladhesh Ato kilonser, Sheikh Hasina aser Bhutan lenir, Tshering Tobgay na densema National aser International lenirtem jaokogo,” ta metetdaktsü.
Hokolbarnü Trinamool Congress tongti lenir, Banerjee-i state nung tang agi tanabenbuba sorkar akumtsü atema asüngdangogo aser lai, 2011 küm Raj Bhavan nung tenangzükba sentong agia liasü, ajisüaka tangbo Red Road (Indira Gandhi Sarani) nung ang tenangzükba sentongji agitsü, ta ashi.
“Nisung timbai kulisüa reprangtettsüsa Red Road nung tenangzükba sentong agitsü,” ta yashi Mamata Banerjee-i metetdaktsü.
Tan agiba state assembly election nung Trinamool Congress-i assembly menden  294 nungi menden 211 tashi nung takok ngua liasü.