Air India-i ticket jenjang ajemtsü atema scheme ka tenzüker

New Delhi, May 21 (Agencies) : Tayimtsü nung senzür tali atsütsü mechi nung Air India-i ticket sen tajemba agi agütsütsü atema scheme tasen ka Honibarnü nungi tenzükogo. Ticket jenjang tajemtibaji sen 1,499 alitsü.
Air India-i ashiba agi, ‘Super Sale’ scheme ajanga India telungtet nung tayimtsü nung senzütsüpur nem ticket jenjang sen 1,499 nungi tenzüka agütsütsü.
Ticket sen ajemer ayokba mapangji tataktet ka dang lir—May 21 nungi May 25, 2016. Iba mapang aliba ticket temji July 1 nungi September 30, 2016 tsüngda ayimtsü atema asütsü, ta Air India-i micro-blogging website Twitter nung parnok official account ajanga metetdaktsü.
Taoba mapang AirAsia India, SpiceJet aser IndiGo airlines temia mapang shia tayimtsü ticket nung sen yamai ajemersa yoka aruogo.
Airlines nung inyaker kari, tayimtsü ticket sen ajemba ya business nükjidong atongtsü atema dang masü, ajisüaka ainlen jajar kanga maliba mapang ajemer, ta ashi.
January nungi March aser July nungi September itatem ya aienlen kanga mejajaba mapang ta airlines temi züngshir.