Yakub Memon densema liaka pa tepsettsübo metemsü: Owaisi

July 30, 2015 nü Mumbai nung 1993 küm bomb aika amshia Mumbai amakba ken o nung aija alisang Yakub Abdul Razak Memon’er kima asüpila sentong dak sentakba nung nüburtemi pa tasümang bener aoba noksa nung angur. Memon tasüba agi merenshitsü anogo atsülangtsü Supreme Court-i memelung, aser tanep 7:00 ako shitak nung Nagpur Central Jail nung pa lisü agi alensetogo. Pa den tatembangbuba asüpila sentong akatsü asoshi tasümangji tayimtsü ajanga Mumbai-i bener ao.

 New Delhi, July 29 (Agencies): 1993 küm Mumbai amakba ken o nung aibelensang, Yakub Memon tasüba agi merenshitsü anogo atsülangtsü atema Supreme Court-i memelungba atema aija tanü All India Majlis-E-Ittehad-Ul Muslimeen (AIMIM) tongti lenir Asaduddin Owaisi-i, Mumbai amakba nung aibelensang yimtenren pusemba maliba ajanga tasüba agi merenshiogo, ta ashi.

Owaisi-i, Yakub ji densema liaka tasüba temerenshi angutsübo malang, ta ashi. “Pa tasüba agi merenshi, kechiyong taoba Ato Kilonser Narasimha Rao-i aniba Congress sorkari pa ashioktsü,” ta pai ashi.

Paisa, taoba mapang Ato kilonser Rajiv Gandhi aser taoba Punjab Chief Minister Beant Singh na tepsetba ken o nung aibelenertem yimtenreni pusemba ama pa (Menon) bo yimtenren ajanga pusemba maliasü, ta ashi.

“SC aser HC-i Yakub nem tasüba agi merenshiba temerenshi agütsütsüla ta ashi, iba yongji iba ya tejashitsü tulu ka lir. Court ozüng agi tasüba agi merenshiba ajanga bomb lendong nung tai maket asürtem indang tatembang kati arur süra chichiba temenen- Babri Masjid bensatsüba aser raksatsüba asoshia tasüba agi merenshiba temerenshi agütsütsüla,” ta pai ashi.

1992-93 küm Mumbai rara mapang Muslims aser Hindus nunger taküm aika samaogo aser nisung 900 tepset, saka “nisung asem dang aija liasü. Ibajia koma tembangtsü, parnoki ochi temeten koma angutsü,” ta Muslim lenirisa ashi.

Akali Dal party ajanga kechi koda Beant Singh tepsetsang kümzük, Tamil party temi kechi koda Rajiv Gandhi tepsettertem alenseta südaktsütsü aliba nung kümzük, ibaji ajaki angazüktsüla,” ta pai ashi.