State nung yi ayokba dokan 500 shibangtsü: Jayalalithaa

Chennai, May 23 (Agencies) : Tan agi trokben buba Tamil Nadu Chief Minister asütsü tenangzükba agiba sülen Tamil Nadu chief minister J Jayalalithaa-i, anogo nung yi ayokba dokan tem tang dang nung gondha ana agi tajemba lapoktsü aser state nung yi dokan 500 shibangtsü, ta metetdaktsü.
AIADMK nükjidong dak keta aliba ama Jayalalithaa-i Hombarnü ‘welfare schemes’ pongu nung sign sütsüogo.
Tang nungi tenzüka state rangben nung yi ayokba dokan tem ajak anüngdang 12:00 ako nungi aonung 10:00 ako tashi dang lapoktsü. Taoba mapang state nung yi ayokba dokan tem anogo nung gondha 12 lapoka liasü, ajisüaka tang nungibo gondha 10 dang lapoktsü.
State nung tanem tanemi yi ayokba nokdangtsü ta party nükjidong nung shia lir. Yi dokan lapoktsü atema mapang ajemtsüba dang masü saka state nung yi ayokba dokan 500 tashi shibangtsü. Tang state nung yi ayokba dokan 6,720 lir anungji dokan 500 shibangba sülen 6,220 dang anüngtsü.
Aluyimertemi loan agiba atoktsü atema lai shidi ka nung sign süogo.
“Alu tila aser tulu ayimertemi mapang tatakzük tatsüka mesüra talangka atema bank balala nungi sen apua alibatem ajak atoktsü aser iba sentsühji sorkari aotsü. Aluyimertemi apua aliba sen ajak senteper sen crore 5,780 lir,” ta Chief Minister office sangdong ka ajanga metetdaktsü.
Tang nungi state nung kibong shia atema electric unit noklang kaka (100 units) talila agütsütsü. Sen crore 1,607 alang electric unit noklang kaka ya mezüng kibong lakh 78 dak tema nem tama agütsütsü aser iba sen ya Tamil Nadu Generation & Distribution Company, Tangedco nem state sorkari agütsütsü.
Tang kibong shia nung atsükba electric subsidy inyakyim nung state sorkari sen crore 3,000 agüja arudar aser tan unit noklang kaka talila agütsü tenzükba sülen sorkari küm nung sen crore 4,607 agütsütsü adoktsü. Aluyimer aser powerlooms tem nem agütsüba subsidy ajak dena sorkari sen crore 6,500 agütsütsü. Item sen rangben ya state sorkari Tangedco nem agütsütsü.
Tamil Nadu nung powerloom ajanga sü atakertem nem tang nungi, taoba mapang ama unit 200 masü saka unit 750 tali angutsü. Iba ya atema state sorkari sen crore 30 subsidy Tangedco nemsa agütsütsü.
AIADMK nükjidong nung aliba ama sensakertem tetsürtem kibong akümba mapang angadi hon agütsüba scheme nunga hon gram 4 dang aliba gram 8 tashi angadi agütsütsü Chief Minister-i sign süogo.
Tang state sorkari sensaker tetsürtem kibong akümdang school mazüngi alirtem nem sen 50,000 aser zünger alirtem nem sen 25,000 agütsüdar.