Myanmar: Anentsü lendong nung 12 anenset, 15 shi yiru

Yangon, May 24 (Agencies): Myanmar anüdoklentip tsütsülen jade sentilung tutuba tesem nung anentsü lendong atalokba osang ka Myanmar sorkar ketdangsertemi tanü, Mongolbar nü metetdaktsüogo.

Tan lendong nung ishiba agi nisung 12 anensetba aser nisung aika samar bushiba osang ka parnoki jangjashitsüogo.

“Kachin state kübok Hpakant jila tezülen jade tutetdak yasüng, Hombar aonung anentsü lendong atalokdakba sülen rescue ketdangsertemi yasüng tasümang 7 aser tanep tasümang 5 tutetba densema tanü tashi nung tasümang 12 tashi tutetogo,” ta pa tenüng memetetdaktsütsü nangzüktepba sülen Naypyidaw yimtiba nung tenzükba police ketdangser kati ashi.

Tzünglu aruba ajanga ali maneni anenzüka alutsüsa akümba ajanga tan lendong ajurushirtem kümzüka anitettsü maparen nem tetsükdakba tulu agütsüba osang ka rescue ketdangsertemia metetdaktsüogo.

Hpakant nungi tutetba jade sentilungji kidangsüa aliba China-i alizükba osang bushiteta lir.

“Tan lendong nung ishikba agi nisung 15 shi yiruba aser maneni nisung 30 shi samar bushiba osang tang tashi nung jangjaogo,” ta Hpakant sorkar ketdangser, Nilar Myint-ia metetdaktsü.

Paisa ashiba agi, nisung 200 shi ali telung nungi jade sentilung tutettsü mapa inyakdang tan anentsü lendongji atalokba osang jangjaogo.

Yaküm, 2015 küm November ita nunga Hpakant nungsa anentsü lendong ataloka jade sentilung bushir nisung 100 dak tema ali agi anensetba osang bushiteta lir.

Kasa tesem nung jade tuteter nisung 13 tashi taoba April ita anensetba osang bushitetogo.

Myanmar linük ya alima ajunga nung jade sentilung tajungtiba angudak lir aser kidangsüa aliba China-i iba sentilung alizükba ajanga mitkar lenirtem den sentaktepa alir jade tutetba tentettemi rongsen tajangzük jenti anguba osanga bushiteta lir.