Home ministry ketdangser ka tepuokdak puokogo

New Delhi, May 24 (Agencies) : Linük nung teraksa bener arutsüba ajanga CBI court kati home ministry ketdangser Anand Joshi June 6, 2016 tashi tepuokdak ayutsü tetuyuba agütsü.

Probe agency-i Joshi dang kecha asüngdangyatsü mali ta ashiba sülen Central Bureau of Investigation (CBI) Special Judge, Vinod Kumar-i Joshi anogo 14 nü tepuokdak ayutsü metetdaktsü.

Joshi ya mapa nungi menentsüdang union home ministry nung under-secretary mapa inyaka liasü. Pa police ket nung anogo pezünü ayuba sülen tanü court nung nokdakdaktsü.

Foreign Contribution (Regulation) Act (FCRA) inyakyim kübok NGO tem indang osang tim masüba inyakyim ajanga sarutenba ajanga pa May 15, 2016 nü CBI-i apu.

Pa ket nungi CBI-i activist Teesta Setalvad meyong NGO, Sabrang Trust indang file tem nguteta lir.

CBI-i Joshi dang parnok den ajuruteptsü osang yokba sülen nungi pa aliba Ghaziabad, Uttar Pradesh nung khen mongui aküm.

Home ministry sangdong ajanga ashiba agi, Joshi ket nung FCRA file ajak liasü aser iba dak sentakba nung ita aika pa kanga mita aliasü.

Ajisüaka Joshi-i, “Ni NGO tem dang nungi sen meshia magi,” ta ashi.