Chumukedima Area G.Bs’ Association-i aitsür

Dimapur, May 24 (TYO) : May 21, 2016 aonung Sovima yimtsüng nung Nagaland Home Minister Y. Patton jabaso Jackson Patton’er ki amakba inyakyim aitsür, ta Chumukedima Area G.Bs’ Association-i sangdong ka nung metetdaktsü.

Jackson’er kidangi tashiyim agi tur injang kahdokba aser licensed aliba prangpongtem bener aoba inyakyim aitsür, ta Chumukedima Area G.Bs’ Association, President, Tokishe Achumi aser Secretary, Atso Gwizan nati sangdong nung shia lir.

Prangpong bener tangar ki kakpoka atuba ajanga tebilemba tamajung nung mapa inyakba jungkai adoka sayur aser Tsüngrem teyari maden asübo lendong tulu ataloker lila. Iba ama inyakyim ya loktiliba nung magizüker aser aibelenertem pua ozüng tapet agi merenshitsü atema nübortemi yariteptsüla, ta mendenpurtemisa metetdaktsü.

Ozü telongtet nung iba ama tesempatsü mapa inyakba magizüker aser aibelenertem putetra, ozüng tesashi agi merenshitsü aser iba atema G.Bs mesüra yimdaklirtemi tebilemtsü mabentsü, ta Tokishe Achumi aser Atso Gwizan nati metetdaktsü.