Pinarayi Vijayan Kerala CM atema tenangzükba agiogo

Thiruvananthapuram (Kerala), May 25 (Agencies): Tanü CPI(M) lenir, Pinarayi Vijayan Kerala Chief Minister inyaktsü atema tenangzükba agiogo; CPI(M)-i aniba Left Democratic Front (LDF) sorkar nung tetsür ana densema tejak tasenpur ajak agi nisung 13 asütsü.

Arishi küm 72 Vijayan-i party nungi V S Achuthanandan madak Kerala nung temaba jenjang angu aser tanü Central Stadium nung state Angh, P Sathasivam-i ketdangsüa pa nem tenangzükba agidakja liasü.

Tang mezüng chief minister Vijayan-i Malayalam oshi nung tenangzükba agi. Pa ya CPI-M Politburo züngsem ka lir aser Kerala nung chief minister 12 buba asütsü.

Cabinet züngsem 19 nungi Chief Minister densema 12 bo CPI(M) nungi lir, CPI nungi pezü, NCP, Janata Dal(S) aser Congress (S) shia nungi kaka.

Taoba Congress-i aniba  UDF sorkar nung minister 21 liasü.

CPI(M)-i aniba LDF-i assembly menden 140 nungi menden 91 tashi ngutetba ajanga Congress-i aniba UDF madak takok ngua liasü.

Tanü nikongdang state secretariat anasa stadium nung nisung 30,000 shi sentepa CM tenangzükba agiba sentong kulisüa reprangogo.

2006 küm nunga taoba mapang Chief Minister V S Achutanandan aser par cabinet züngsemtem Raj Bhavan kima tenangzükba agia liasü.

Tanü iba sentong nung taoba mapang Ato kilonser, H D Deve Gowda, taoba Chief Minister tem- Oommen Chandy, V S Achutanandan, CPI(M) General Secretary Seetharam Yechury, Prakash Karat, taoba mapang revenue minister inyaksang arishi küm 97 K R Gowri Amma, taoba mapang union minister aser assembly nung BJP züngsem, O Rajagopal, tamangba aser sobaliba lenirtem den film actor aika dena liasü.

State Angh-i tenangzükba agidaktsür minister temji- (CPI-M) nungi Thomas Isaac, A K Balan, G Sudhakaran, E P Jayarajan, Kadakampally Surendran, K K Shylaja, J Mercykutty Amma, T P Ramakrishnan, A C Moideen, C Raveendranath aser K T Jaleel (CPI-M-IND), CPI nungi E Chandrasekharan, V S Sunil Kumar, P Thilothaman aser K Raju, Congress S nungi Ramachandran Kadannappalli, NCP nungi A K Saseendran, aser JD(S) nungi Mathew T Thomas nunger liasü.