Check gate nung menaba temenen

Assam nung tang mezüng BJP teloki aniba sorkar kümli chief minister, Sarbananda Sonowal-i par state o tanga state na tsüngda inter-state check gate yanglua aliba ajak agientsü asoshi ozüng agütsüba mapa jagi Assam police den dang masü saka asenok ajak den jembir. Sonowal-i pa chief minister kümli par state arrtsülen check gate yanglua aliba agientsü ozüng agütsüba tetezüji pai check gate nung policetemi tim masüba mapa inyakbatem mapang talangka nungi kanga jashia repranga liasü ta angatetter. Atangji, alima kin o kin na tsüngda mesüra state o state na tsüngda arrtsü nung süngkhüm (gate) yanglua yur anüker, kechiyong ibaji kanga nüngdaker. Süngküm yanglur yangji mitkartem yur mita anük nung dang temelaba melii bendanger mashii marutsü aser ozüngi memelaba machimajemtsü aser osettsüset shibelenba mapatem nokdangtettsü. Aji oda, alima kin shia mesüra state shia pei pei state süngkhum yanglua ayuba nükjidongji pei lima ozüng raksartem nungi kümzüka ayutsü asoshi lir. Ajisüaka, süngkhum nung mitakartemiang ozüng raksara, atangji, süngkhumji mayuang tajungba. Angazükba agi, Assam nung talisa West Bengal len süngkhüm anüktsü asoshi police-tem rongnung kanga rakteper. Iba jagi tulurtem nem sübokrem sen aika agütsür külenang iba ama süngkhüm anüktsüba mapajibo atar. Ibaji asenok aikati mangatettsü. Asenokibo nükenbelema süngkhüm nüka kazütsü agibo tanga mapa lemzükang tajungba asütsü ta bilemtsü. Ajisüaka, policetem rongnung süngkhüm anüktsü raktepbaji tapi agibo masü, yangji angati senotsü angulen lenmang aika adoker. Aji oda, state ka nungi kati aoba lenmang nungbo anogo nung  khu abenba gari meyirijang junga süitsü aser item gari shia nungji sen ter danga aginunga aika asütsü. Ano, gari aika sorkar nem tax shitak magütsüi senzür, anungji item jagi süngkhüm anükertem nem sen agütsür. Ano, khu karbo ozüng anema bener ajangtsü asoshi süngkhüm nükertem nem sen agüja alitsü.  Iba ama süngkhüm anüker asoshi sen angulen aika alitsü. Item sentemji süngkhüm nukertem o tulurtem na lemsaa agir. Atangji, anogo shia parnoki anükba süngkhüm ajanga süir garitem ajunga nungi sen sarua agir asünungji süngkhüm nükertem o tulurtem najibo jangratemtsüka saka khu abenertemi süngkhüm nung mitkartem nem agütsüba sento shishilembadak dokan nung nübortem dang nungi agitsü. Aji oda, kechi oset südir süang tayokertemi pei akoksar mayoktsü, anungji dokan nung asenok dang nungi agiba sen nung to parnoki alizüka bener aruba den gari bara, godown nung ayuba taa aser lenmang nung tesem tesem nung mitkartem nem agütsüba sen ajak bendener külenang parnok tajangzük angutsüsa sentak ataker ayoktsü. Iba amaji süngkhüm nung mitkartem  nem agütsüba sen to asenoki dokan nung agütsür. Tanü shishilembadak osettsüset aser chiyongtsü nung sen atubaji ayangertem sen taa atuba aser gari totzü nung sen atuba dang masü saka asenoki mengujemba mapatem aika lir. Atangji, Assam nungbo ILP mamshir, anungji süngkhümji maliyonga kecha masü saka Nagaland nungbo alitsübasa. Ajisüaka, asenoki Nagaland süngkhümji ILP mitdak aser ozüng raksartem nokdangdak masü saka ajanga süir gari shia nungi sen sarudak tesemang ka kümdaktsüra, Naga nunger ajak asoshi alima tsüngdang nüngku bentetdakji aji asütsü. Tang Assam nung jembiba amaji mapang kabo Nagaland nunga süngkhüm anükertemi sen saruba aser police-tem rongnung süngkhüm anüktsü raktepba aser süngkhüm anükertemi tulurtem nem tesarutetba nungi shilem tulubalenka agütsüba otsü kanga jembia liasü. Ajisüaka, tangbo yamaji inyaka malitsü ta amanger. Alima ka ajung majung metettsübaji pei lima süngkhüm mitkartem dak tuluka keta lir. Aji oda, süngkhüm anükertemjibo süoshi agiba aser jembishinü nunga kenyongi balaka wainshin metetba purtem asütsüla. Ajisüaka, tangar asen limai arudang, süngkhüm nung mitkartem yi jemer, tebang sünga sali mangümer, moko  chia aruagi sen meshira, Nagaland topur ajung otsübo yangji temtsüogo ta bilemdi.