Tibet nüburtemi lungjema alitsü ajungshir: Lama

Dharamshala, May 27 (Agencies): Tibet nunger tanülar lenisang, Dalai Lama-i Tiber nübur ajunga lungjema alitsü tajungshiba olen ka tanü, Hokolbar nü sangoktsüogo.
Tibet nüburtemi par yimtenren lenir shimtsü nükjidong nung parnok rong nung mangatettep adoka, telok balala küma telungjem raksaba atema nüburtem aitsüba olen ka Lama-i metetdakja liasü.
“Nenoki ni nenok tembar ka ama züngokra, nenok rong nung tamangba yimsü mesüra yimtenren ken o nung ajemdaker telungjem raksaba maparen malitsü ajungshir. Asen nübur rong nung telungjem aliba ajanga dang asenoki ka kümer Tibet nem peisasa pei madak yimsü asütsü temeten agütsüdaktsütsü asoshi China anema takok ngua nokdaktettsü,” ta arishi küm 80 tain Lama-i ashi.
Bendanglen jenoka alir Tibet nüburtemi bendanglen tentetba sorkar nung Ato Kilonser tanabenren inyakdaktsütsü asoshi Lobsang Sangay taoba April ita shima liasü.
Aji oda, India kübok Dharamshala nung agiba Lobsang-i Ato Kilonser inyaktsü tenangzükba agiba sentong nung shilem agia onük jembidang Lama-i par nüburtem lungjema alitsü tajungshiba olenji tanü sangoktsü.
Dalai Lama-i 2011 küm nungi tenzüka yimtenren tashi abenbaren toktsüba sülen Tibet nüburtemi par yimtenren lenir tanga shima, Tibet-i peisasa pei madak yimsü asütsü temeten bushidaktsütsü tenzüka lir.
China nungi nüchiso ngua peisasa pei madak yimsü asütsü temeten agizüktsü atema masü saka China yimli kübok densema, par Tibet-i peisasa pei madak yimsü asütsü asoshi Lama aser Sangay napronglai nungdakba maparen inyaktsü tenzüka lir.
China aser Lama’er ketdangsertemi senden mena par mangatettepbaren bentettsü senden tatemsüa 2010 küm amenba sülenbo parnoki tsüngdong ajurutepa senden mementeti lir aser iba mapang nungi tenzüka, Lama-i par Tibet toktsüsüsa küma tang Dharamshala nung jenoka aliba osang bushitetogo.
Ano külen, China-i Sangay-i aniba Tibet sorkar magizüker aser tesüiba mapang, 1951 küm Tibet China yimli kübok arok tangatettep nung anoiksem ta züngshir.
Ajisüaka, Harvard nung züngtetba okatsür, Sangay-i par Tibet mangdang asangsang nung ajangzükdaktsütsü asoshi alima jenjang nung tentetba tentet balala den ajurutepa teyari bushiba osanga bushitetogo.