Modi’er sorkar küm 2 jungogo

Küm ana tejakdang May 26 nü India Tir, Pranab Mukherjee-i Prime Minister Narendra Modi aser par Cabinet nem Centre sorkar ketdangsütsü atema tenangzükba agidakja liasü. India nung küm 30 sülen Centre nung BJP-i sorkar tentettsü atema nübo peria angu aser iba sorkar tenangzükba agiba sentong ajanga Team Modi-i linük nung temelenshi bener arutsü renema lir ta sayua liasü. Tang Modi’er sorkar küm ana ajungba atema benjungdang, asenoki par sorkari inyakba mapa kar meyipa reprangdangdi. Mezüngbuba nung asenoki Modi’er sorkari inyaktetba mapa tajung kar meyipa reprangdangdi. Gulf War I sülen tanü putu nung nisungtem anienba maparen tulutibaji Modi’er sorkari inyak aser ibaji Yemen evacuation liasü. Modi’er sorkari linük nung nisung mashi kati bank account lapoktettsü atema Jan Dhan Yojana ta ser mapa ka tenzük aser iba mapa tenzükba sülen hopta ana jungmajung ka nung Guiness Book of World Records-i aitsüsa inyaktet. Petroleum & Natural Gas Ministry-i küm nung sen lakh 10 tema angurtem nem LPG subsidy magütsütsü telemtetba agi aser iba nungi sen ajangzükba ajanga süng aser kerosene amshir nisung lakh 5 nem LPG connections agütsü. Modi-i apiteta tenzükba Swachh Bharat mapatong ajanga nübortem ajungmeso aser pei talidak merükmejuba dang masü saka Centre sorkari metsümeshidak talila yanglutsü aser jana endokba maparen tajungba nung inyaktsü sentongtem tenzükogo. Bank aika nung sen apurtemi sen meyipa magütsüba khuret koktettsü aser Centre-i entrepreneurs talila adokdaktsütsü nükjidong nung Modi’er sorkari Congress teyari agia tawa Budget Session nung bankruptcy ozüngtem yanglushiogo. Modi’er sorkari Mann Ki Baat ta ser radio, DD National aser DD News nung sentong ka tenzük aser iba sentong ya India nung mezüngbuba lir. Iba sentong nung linük nung ketdangsertemi mapang shia nübortem ayongzüka jembir. Communications Ministry ajanga Digital India sentong tenzüker kanga junga inyaka arudar. Iba sentong kübok Centre sorkar nung minister aser ministry ajak Twitter nung lir aser mygov.in ajanga e-governance maparen inyakba ajanga nübortem ajangzüker. Tanabuba nung asenoki Modi’er sorkari mapa junga meinyaktetba kar meyipa reprangdangdi. 26/11 Mumbai amakba lendong sülenbo kiralongrartemi mapa tulu inyakbaji Pathankot nung aliba IAF air base amakba liasü, ajisüaka iba lendong atema Centre sorkari mapa junga meinyaktetba agi ashishitep onük aika adok. Iba mapang Centre sorkari kiralongrartem kwi aruar meshiteti ratamataba ajanga nisung aikati sorkar dang temulung melemtettsüsa aküm. Hyderabad Central University nung Dalit nunger Research Scholar ka soseta asüba, Jawaharlal Nehru University nung linük anema noktakba onük, FTII students’ strike, Aligarh Muslim University nung off-campus centres meyaritsü lemtetba aser IIT-Madras nung Ambedkar-Periyar Study circle shibangtsüba onüktem asoshi nübortemi Minister Smriti Irani aser Union Ministry of Human Resource & Development dak tai tonglokja ola adoktsü tenzük. Taoba general elections nung BJP-i bendanglen sen miima rizünga aliba linüki meyipa bener arutsü ta nangzüka liasü, ajisüaka parnoki iba mapa takok ngua meinyaktet. Finance Minister Arun Jaitley-i blackmoney ajak India-i meyipa bener arua higher education, real estate aser mining nung amshitsü ta sangoktsü saka ibaji mapa küma meinyaktet lir. BJP-i yimsü asüba state tem nung dang masü saka tanga state tem nunga Hindutva tangatetba sülen anidakertemi nübo agi tangar menenepertem amakba lendong aiben ataloker, saka Centre sorkari aser Prime Minister-i item tatalokba yimjak nung maitsür aser item lendong indang mejembir. Parliament aser State Assembly tem nung tetsürtem nem menden wazüka yutsütsü onük Centre-i mejembir. Iba bill ya 2010 küm Rajya Sabha nung agizüka ayu saka tang tashi Lok Sabha nung mebenok lir aser tang Lok Sabha nung BJP nübo timba ser lir. Tatemsa, Centre-i sentong tajung kar tenzüka alibatem asenoki reprangdangdi. Kechisarena yangluba linük ka kümdaktsütsü atema Modi-i Make In India mapatong tenzük aser iba asoshi India-i bendang linüktem nung sentongtem ayongzüka agiogo aser Modi-i linük aika semdanga teyari meshiogo. Centre sorkarisa tesüiba küm ana tsüngda Atal Pension Yojana, Jan Aushadhi Yojana, Kisan Vikas Patra, Sukanya Samriddhi Scheme amala welfare scheme aika tenzükogo. Centre nung Prime Minister Narendra Modi-i aniba sorkar kümsük ano küm asem anünga lir aser iba mapang parnoki inyaktsü nangzüka alibatem ajak mapa küma aser takok ngua inyaktsü imlar. India linük nung küm aika Congress teloki len anir Centre sorkar ketdangsüa aru aser Bharatiya Janata Party(BJP)-i iba sorkar atsüngdoktsü atema kanga meranga arur, taoba elections nung takok tulu ngua sorkar kümteter ketdangsüa arur. Election mapang BJP-i India linük matsüngdang tenangzükba aika agiogo aser nübortemi parnok nem maongka agütsüra item tenangzükbatem mapa küma inyaktsü aser India linük nung temelenshi bener arutsü ta ayimoktsü. Iba yimyim nung tamang kaa India nungertemi temelenshi aginüba agi BJP nem takok tulu ngudakja sorkar yimsü asütsü tashi agütsüogo, anungji nübortem teimla aser taginüba tongtsütsüsa BJP-i aniba NDA sorkari inyaktsüla.