Factory apokba lendong nung asür 12 jungogo

Mumbai, May 28 (Agencies): Thane district, Dombivli nung aliba factory ka nung  boiler apokba lendong nung asür 12 jungogo, ta tanü NDRF ketdangser kati ashi.
“Yashi nisung 11 asüba osang liasü. Tanepa iba tesem nung tasümang ka anguba osang jangjaogo,” ta National Disaster Response Force (NDRF) ketdangser kati ashi.
“Yakünü tasümang trok angu aser yashi tasümang pezü angu. Ano yirua alir ka hospital nung asüba densema yashi tashi nung ajak agi nisung 11 asüba osang liasü,” ta paisa ashi.
Asürtem rongnung Probace Enterprises kibur, Dr Vishwas V Vakatkar’er jabaso ana aser jabaso kinüngtsü ka densema liasü.
Iba tatalokba atema Police-i factory kiburtem anema IPC section 304-A, section 337 aser section 338 kübok ken o benokogo.
Brihostibarnü Probace chemical factory nung boiler ka apokba sülen mi tulu adoka anasa aliba factory ana tashi raksatsü.
Factory apokba ajanga iba tesem kilometer 2 telungtet nung ki, office aser dokan 600 dak tema raksatsü.