S Korea dang taochi mesayutsü: N Korea

Seoul, May 28 (Agencies): South Korea dang taochi mesayui amaktsü amokmerenba olen ka North Korea-i tanü, Honibar nü metetdaktsüogo.
S Korea’er tzüyim sepaitemi tezülen injang kalokja par linük ana tsüngda mangatettep adokba Yellow Sea tzüyim arrtsü adena Seoul lushi telungi aiba N Korea rong kar amokmerenba nem telangzüba agüja, N Korea-i tan iba amokmerenba olenji sangoktsür lir.
“Tzüyim arrtsü adena, ozü lushi telungi aitba S Korea nunger dang khen yongi taochi mesayui parnoki aniba rong nung injang kaloktsütsü renemogo,” ta N Korea’er mitkar lenirtemi tanü sangoktsü.
“S Korea tzüyim mitkartemi tensa mejungi kümdaktsüba atema taidok meshitsüla,” ta parnoki takhangba benoka liasü.
N Korea’er patrol rong ka aser angopur rong kati arrtsü adena S Korea tzüyim lushi telungi aiba sülen S Korea’er tzüyim mitkartemi rong tezülen injang kalokja arrtsü adenertemji yashi amokmerenba osang jangjaogo.
Ano külen, Par linük ana tsüngda adokba mangatettep ken o bentettsü atema par Korea linük anati yimjung senden amentsü asoshi N Korea lenisang, Kim Jong-Un-i tawa onük benok saka Seoul-i iba olenji magizüki lir.
Pyongyang-i tenzükba tongpang nung amshitsü nuclear osettsüset yanglua kasaji tendangba maparen anentsü mulungtetba sülen ang par linük den yimjung senden amentsü ta Tir, Park Geun-hye-i aniba S Korea sorkari metetdaktsüogo.