Colombia: Telungpuri tashiyim agi pua ayur osangbener 3 chiok

Colombia nung tentetba telungpur telok, ELN ta ajaba National Liberation Army (NLA)-i chiokba sülen, Spanish-Colombian osangbener, Salud Hernandez-Mora (Tiyongtsü)-i Colombia kübok Bogota yimti nung arok osangbener den ajurutepba noksa ka yangi angur. (Bogota, May 28)

Bogota, May 28 (Agencies): Colombia sorkar anemba telungpurtemi tashiyim agi pua ayuba osangbener 3 tashi yashi, Hokolbar nü chiokba osang  angazükogo.
ELN ta ajaba National Liberation Army (NLA) telungpur teloki Spainish-Colombia tsür, Salud Hernandez-Mora Colombia northeast tsütsü, Catatumbo nungi taoba Honibar nü tashiyim agi apuba osang jangjaogo.
Coca-tong nungi cocaine temeseptsü chiyongtsü yanglua kasaji Venezuela-i ozüng alema shibelenertem den ajurutepa parnok indang otsü zülutsü asoshi Salud-i Catatumbo semdangba osang jangjaogo.
ELN telungpurtemi Spain nung adokba El Mundo aser Colombia nung adokba El Tiempo osangkaket indang osangbener, arishi küm 59 tain Salud Roman Catholic Church telok ka nem yashi agüja, la chioka liasü.
Ano, telungpurtemi Salud tashiyim agi pua ayuba osang agidang RCN network indang osangbener, Diego D’Pablo aser Carlos Melo nata ELN teloki tan Hombar nü tashiyim agi apu.
RCN osangbener anajia Salud chioker ghonda ishika lir külen chioka liasü.
Küm 50 tejaklen nungi tenzüka Colombia sorkar aser telungpur na tsüngda tongpang kanga sashia raraba ajanga Colombia nung tensa kanga mejungi aliba osang bushiteta lir.
Colombia sorkar den yimjung senden amentsü mulungba osang ka Colombia nung tentetba telungpur telok tongti rong nung tanabuba, ELN teloki tawa metetdaktsü saka tan amala tai maketba nüburtem tashiyim agi apuba ajanga telungpur aser sorkar na tsüngda yimjung tezüngzüktep agitsü maparen nem tetsükdakba bener arutsüba osang bushitetogo.
Colombia sorkari küm 3 tejaklen nungi tenzüka, Colombia nung tentetba telungpur telok tulutiba, Revolutionary Armed Forces of Colombia (FARC) telok dena Cuba kübok Havana yimti nung yimjung senden amentsü tenzüka lir aser FARC o Colombia sorkar na tsüngda meraratsü tezüngzüktep agir joko küm 1 abensaogo.
Colombia sorkar anemer telungpurtemi 1964 küm nungi tenzüka Colombia sorkar jirepdaktsütsü nükjidong nung Colombia sorkar den tongpang kanga sashia raraba ajanga tanü tashi nisung 220,000 dak tema tepsetba osanga bushiteta lir.