Angh P. B. Acharya-i NEC aser DoNER ministry dang teyari meshi

Dimapur, May 28 (TYO) : May 26, 2016 nü Shillong nung North East Council (NEC) 65 buba Plenary Meeting nung Nagaland aser Assam Angh, P.B Acharya-i o jembi.
Iba mapang Angh P.B Acharya-i ashiba agi, North east nung Terenlok aser Yimjung bener arutsü atema Parliament nung Act ka ajanga North East Council (NEC) tenzük.
“North East nung state 8 dena lir aser item dang asenoki NAMASTE states ta ajatsü akok. Tesüiba küm 30 tsüngda NEC ajanga iba tesem nung terenlok jenti bener arutsüogo aser tang asen Prime Minister, Narendra Modi-i Act East Policy tenzükba nung kechisarena ajaklen terenlok angutsü aser teti atema yimjung bener arutsü atema nükjiong lir. Anungji, asenoki Act East Policy takok ngua inyaktsüla,” ta pai ashi.
“August 3, 2015 nü India sorkar aser NSCN(IM) tsüngda ‘framework agreement’ agibaji kanga dang mapa tajung ka lir aser nisung ajaki pelashishia agizükla. Iba tenangzüktep ajanga asenoki tesüiba mapang atalokbatem toktsütsü maongka tulu agütsür aser telatetba ka angutsü atema yimjung maparen pusema nungittsü mapang ka bener arutsüogo,” ta P.B. Acharya-isa metetdaktsü.
“Centre sorkari Dimapur nung Regional Passport Office ka lapoktsüba aser ano Veterinary College ka lapoktsü mulunga agizükba atema Nagaland sorkar tenüng nung ni Centre dang kanga pelaba metetdaktsür. Kohima, Nagaland nung Medical College ka lapoktsü atema state sorkari ali tasazük acre 40.251 ngutetogo aser college yangluba nung sen crore 233.76 shi endoktsü ama asadangteta lir,” ta Angh-isa shisem.
Paisa ashiba agi, Nagaland state sorkari Mahila IR Battalion ka dena Indian Reserve Battalions tenet lapoka lir aser item Battalion nem NEC aser Ministry of DoNER ajanga infrastructure teyari agütsütsüla.
P.B. Acharya-isa Tea Industry, Bamboo Development aser Dimapur-Imphal-Agartala-Kolkata/ Guwahati tsüngda Air Connectivity indang onüktem jembi.
NEC ajanga North East state tem nung Food Park aser solar Park, Cold Storage Chain aser Skill Development dak sendakba mapatem inyaktsüla, ta Nagaland aser Assam Angh-i ayongzük.
“Ni acha-ayanga aser Indian National Fellowship Centre, Mumbai-i teyari agüja Nagaland nung People to People Fellowship Exchange Programme agiogo aser iba mapang Mumbai nungi specialized doctor tem arua tesem balala nung angati medical camps agiogo. Iba ya Nagaland nung alirtem aser India kübok tanga tesem nung alirtem tsüngda tesentaktep yanglutsü nükjidong nung ayongzüka agi aser mezüng asoshi healthcare aser education shima mapa inyaker” ta Acharya-isa metetdaktsü.
“Ano Nagaland kübok Mon aser Kiphire district tem nung Indo-Myanmar arrtsü anasa Naga nunger nisung meyirjang aika lir. Parnok district Hospitals/Government Schools nungi medical aser shisaliok teyari agir aser asenoki arrtsülen aliba District Hospitals/Government Schools nem private/public MoU mesüra tanga inyakyim kar ajanga teyari agütsütsüla. Iba dak sendakba nung ni Art of Living Centre, Bengaluru tenzüksang Sri Sri Ravi Shankar den tebilemba lemsatep aser Art of Living (AOL)-i Public Private Partnership (PPP) kübok Health Centre/School lapoktsü atema teshimtetba nübo ka yoka reprangshimogo. Item mapaji Art of Living aser Indian National Fellowship Centre (INFC), Mumbai ajanga inyaktsü,” ta P.B. Acharya-isa metetdaktsü.