Jerusalem nung Bus amakba atema Palestine nunger 5 apu

Jerusalem, May 29 (Agencies) : Jerusalem nung April ita bus ka tapoktsü poklokja poksatsüba dak sentakba nung Israel security force temi Palestine nunger nisung pongu pua lir, ta Deobarnü Israel army sangdong ka ajanga metetdaktsüogo.
April 18, 2016 nü Jerusalem nung bus poksatsüba mapang tajemba agi Israel nunger nisung 21 tashi yiru, ta Xinhua news agency osang ajanga ashi.
Ashiba agi item nisung pongu ya Hamas organisation züngsem lir aser parnok lenisüba kübok iba ama amaktsü sentong yangluba den tapoktsü tesashitem yanglur, ta Israel Defence Forces (IDF) otongdari sangdong ka ajanga metetdaktsü.
Shin Bet security agency-i sangdong balaka ajanga ashiba agi, tawa ang West Bank of Tekoa len Yihuda nunger aliba tesem ka nung Palestine nunger nisung anati injang agi akah, ajisüaka tia ka yiruyipong kecha matalok.
Israel nunger aser sepaitem ano menani amaktsü sentong lir, ta kasa agency ajanga metetdaktsüogo.
Tang pua aliba Palestine nunger nisung pon gu ya taruba hopta obendangtsü.
Israel aser Palestine na tsüngda taoba October ita nungi tenzüka rara arur. Iba rara ajanga tang tashi nung Israel nunger 28 aser Palestine nunger nisung 204 tashi taküm samaogo.
Iba rara ya Palestine nunger ketdangsertem mekümdangba ajanga lir ta Israel lenirtemi ashir, ajisüaka Palestinian nunger kimong mesemtettsü aliba tesem, West Bank, East Jerusalem aser Gaza Strip territories tem Israel nungeri amanglemba ajanga iba rara adok ta Palestine nungeri ashir.