Ochimashi tera nungi atsüdoktsü: PM Modi

New Delhi/Devangere, May 28 (Agencies): BJP-i aniba NDA sorkar küm ana ajungba benjungmung nung Ato kilonser, Narendra Modi-i, junga yimsüsüba ajanga tesüiba küm ana nung temelenshi aruogo, ta ashiba den külemi linük nung ochimashi tera nungi atsütoka küm aika auyadaktsüba nüburtem taküm jenjang tajungba kümdaktsütsü, ta nangzük.
Honibar aonung New Delhi nung “Ek Nayi Subah” sentong nung jembidang Congress tenüng metetshii Modi-i, Opposition party-i tetsükdaktsü bener arutsür, ta aitsüba den külemi nüburtemi ibaji reprangteta ochi jangjatsü imlar, ta ashi.
UPA sorkartem mapang ochimashi ken otem dak sentakba nung Ato kilonseri, “Ozü sorkari ochimashi nung tongtibangsüa rangloktsü, aser taoba sorkartem den medemdangra nüburtemi ibaji jangjatsü,” ta ashi.
“Asenoki taoba sorkartem mapang inyakba mapatem mebilemtetra, (onoki) mapa tulu inyakteta alibaji asenoki merajemtsü. Ni ozü linük nüburtem matsüngdang nüma tanga nokdaker. Nüburtemi onok dak tamang katetba aser tejangraba angur. Anogo aben nüburtemi tamang kateter. Ibaji ajanga onok mulung alemer,” ta Modi-isa ashi.
Sorkar küm ana ajungba sentong dak sentakba nungsa Deobarnü Karnataka nüburtem atema Ujjwala Yojana scheme tenzüktsüdang Modi-i, tesüiba küm ka nung kibong crore asem dak tema nem sorochiokba gas connection agiogo, ta metetdaktsü.
Bengaluru nungi kilometer 260 shi pilar aliba Davangere nung lokti senden ka nung jembidang Modi-i, “Iba scheme kübok taruba küm asem nung onoki security deposit magii linük nung BPL kibongtem nungi tetsür crore 5 nem sorochiokba gas connection agütsütsü,” ta ashi.
“Gas nung sorochiokba ajanga rongsen kümzükba dang masü saka tetsürtem anema alibaren atemaa tajangzük lir, iba dak alia yimtsüngtem nungbo tang tashi sorochioktsü atema süng amshir, anüngji arem nung aliba sünga wazüka yutettsü,” ta paisa ashi.
Ato kilonserisa, par sorkari tenzüktsüba Jan Dhan Yojna, Swachh Bharat Abhiyan aser ‘Beti Bachao, Beti Padao’ mapatongtem ajanga tesüiba küm ka nung linük nübur million aika tajangzük nguogo, ta ashi.