Nübortemi inyaktsüsa akümer

Nagaland nung election ka agili gari lenmang tamajungba kümli, election ka agili mozü ki tamajungba kümli, election ka agili sorkar school tamajungba kümli, election ka agili light post tejen dena memelentet kümli ta Nagaland nung sorkar mali ama küma aoba agi nübortemi sorkari inyaktsüba mapa ajak temulunger tenla bendena inyaktsüsa kümogo. Aji oda, joko lia lia National Highway dena nübortemi sarutepa yanglutsüsa akümba tiaji nübortem asoshi tamajungtiba tia kati tongogo ta sayur. Iba sülenjibo nübortem taküm aser rongsen kümzüktsü asoshi police melen nübortem agi mitkar kümer pei ki aser pei yimtsüng anüktsüsa akümtsü. Joko, school Education department-i government school nung tesayur peria meyoktetba ajanga Managing Board purtem rongnung temulunger tenela saruteper tesayur shimtsüsa kümogo. Aji oda, light yindong song agi chimar telaor saka Power department-i itemji memelenteter, anungji nübortemi itemjia temulung tenla bendena melener. Talisa town-tem nung gari lenmang agi ayong kümer sorkari meyanglutetter, anungji kiyonger, mepusanger aser yimertemi sarutepa yanglutsüsa akümer. Iba amaji sorkari mozü ki dena merüka meyuteter, anungji temulungetemi tenla agüja mozü kitemji dena yanglushitsüsa akümer. Iba amaji Nagaland  nungbo sorkari nübortem yarir masü saka nübortemiang sorkar yarir. Aji oda, tang amaisa sorkar inyakyim odi asünungbo, sorkar nung inyakertem ita sen aser terenlok mapa inyaktsü asoshi lemzükba sen ajak nübortem nem agütsür inyakba tajungba asütsü. PWD department lir saka parnoki inyaktsüba mapa ajak nübortemi tenla agüja inyakra, sen endoka departmentji ayutsü nüngdak madoker. Iba kasaji Power, medical, Education aser tanga department-tem nung inyakertemji Nagaland yarir masü Nagaland kangshirtem amai dang kümogo. Atangji, lenmangji nübortem  meyong, mozü ki aser school-temjia nübortem meyong, anungji nübortemi apiteta item mapatemji inyakbaji tangar asoshi inyaktsür masü saka pei atema inyaker. Ibaji angateta nübortemia inyaker alitsü. Ajisüaka, lenmang yanglutsü atema ita sen agüja ayurtemji kechi inyaka kazüdaktsür ? Lenmang yanglutsü asoshi sen lemzükba ya kechi koma kongsa endoka aru ? Nübortem lendongi aitsüsa light post laodi asür saka ibajia memelenteter süra Power deparment-i kechi reprangtsü ? Mozü kidang doctor nurse peria mali, mozü kidang teshinem agi tekazü majung, tanur asoba takdangang tamajungba aser shiranger amongba takdangtemang tesempatsü taketba süra, sen paikaya endoka medical department ayuba ya kechi nüngdak ?  Aji oda, Delhi nungi yokba sen kar ayongayonga chia mongli aser mapabo nübortemi sarutepa inyakli ta asüba ya sen achirtemibo kanga menünüa bilema alitsü. Atangji, terenlok mapa nung nübortemi tenla agüja peisasa shilem agia inyakbaji junger aser maneni yamaji inyaktsüla. Ajisüaka, nübortemi metettsü kaji, mapabo asenoki inyak saka iba tenüng nung senbo kar nem agizüka chidaktsü ta süra asen lima kodanga majungtsü. Nübortemi angatettsüba kaji, tang khen atemabo asenok sarutepa lenmanga yanglutettsü, light post-tema karbo melentettsü, tesayurtema shima yutettsü, school kitema takdang karbo yanglushitettsü aser mozü kitema merüktettsü. Ajisüaka, item mapaji tetibo asenoki temulunger tenla kija agibo meinyaktettsü, anungji item mapatem inyaktsü asoshi shirnok shim aser shirnok asoshi sen endoker, item jagi inyaktsüla. Aji oda, nübortem asoshi nüngdak mapatem meinyaktsüli süra pei agitsü rongsen kisüng bushia senzütsü agibo tamasayongi asen lima nungbo election magiang tajungba aser minister aser MLA-tema maliang tajungba. Parnok aliba jagi nübortem meyong senotsü tali endoker, anungji parnok mali ser item sentemji terenlok mapa nung amshi tajungba asütsü. Atangji, alima ajungtsübaji nübortem dak tuluka keta lir, anungji nübortem ochishia aser wainshin meteta lira, iba amaji yimsüsür aser tulurtema alitsü. Aji oda, tanü terenlok mapa inyaktsü asoshi mulungsua tenlabaji tatem masü saka sorkar maparen nung ochimashi mapa meinyakdaktsütsüsa teti mita atatsüji senso shiai pei tata shilem amato inyaktsüla. Iba jagi dang asen lima ajungtsü.