Smartphone ya tebur dang nungia tetsüri tamshiba

May 30, 2016 : Tetsüri anogo nung smartphone gondha pezü dak tema amshir aser tebur dang nungia parnok yimya tesübaba akümer, ta iba tsütsü tan mezüngsüa bushisüngdangertemi ashi.
Iba bushisüngdang ya South Korea nung agi aser parnoki, bushisüngdang nung adener tetsür noklang nung shilem 52-i anogo nung smartphone ghonda pezü dak tema amshir saka teburbo noklang nung shilem 29.4-i ang yamaji amshir, ta ashiba Hombarnü Korea Times osangkaket ajanga metetdaktsü.
Iba den külemi tetsür noklang nung shilem 22.9-i anogo nung smartphone ghonda trok amshir ajisüaka teburbo noklang nung shilem 10.8-i ang yamaji amshir, ta nguteta lir.
Ajou University, South Korea nung Professor Chang Jae-yeon-i, iba bushisüngdang nung ni Suwon, Gyeonggi province nung aliba college trok nungi kaketshir nisung 1,236 nem shilem agidaktsü, ta ashi.
“Tang shilem agir dang nungi teküpok züngara reprangdangra smartphone amshiyim kasa angur. Tetsürtemi mapang shia pei phone mamshi nung ajungtsü,” ta Public Health Reports kaket nung adoktsüba osang nung Chang-i shia lir.
Tetsürtemi smartphone amshibaji social networking atema amshir. Parnoki Facebook aser Instagram kanga bulua amshiteper. Tetsüri call asüba aser agizükba, games asayaba aser langka tagitsü bushiba dang nungibo smartphone ji social media atema timba amshir.
Teburtemibo smartphone ya anisüngzükba mapang ang timba amshir, ajisüaka tetsürtemibo tangar den jembidang mesüra jajaba mapang ajak nung phone repranga jembir aser jajar, ta iba bushisüngdang ajanga ngutetogo.
Tetsür noklang nung shilem 20.1-i smartphone ama melira balaka bilemer ta ashi ajisüaka tebur noklang nung shilem 8.9-i ang yamaji bilemer.
Tetsür karbo smartphone ji pei jangraba agi amshir masü saka yimya tamajung sübaba ajang lir aser iba jagi parnok tekolok nung memeteti timtem adokdaktsür.