Lexington Challenger: Yuki Bhambri 2 buba round-i iogo

Lexington, July 30 (Agencies): India nunger tennis asayar, Yuki Bhambri-i Croatia nunger Matija Ecotic madak 1 buba round asaya koka tang tasayadak Lexington ATP Challenger indang 2 buba round nung shilem agitsü jenjang tanü Brehostibar nü nguogo.
Ajisüaka, külem sensopur, Ramkumar Ramanathan-i tanü tamakok ajurua liasü.
Yashi tzünglu kanga sashia aruba yong Yuki o Ecotic nati tanü ang par asaya tembanga asayateta liasü aser Yuki-i points 7-5 6-1 ngua tanü takok angu.
Yuki aser Ramkumar nati 2 buba round nung ajuruteptsüsa liasü saka Britain nunger Brydan Klein-i points 6-3 6-3 ngua Ramkumar 1 buba round nung tsükdaktsü.
Britain nunger Liam Broady-i points 6-2 6-1 ngua Saketh Myneni-ia tsükdaktsüba yong Yuki tan asayamong tebur singles shilem nung shilem agir India asayar kija kümogo.
Ano külen, Myneni aser Dimitar Kutrovsky nati points 7-5 5-7 10-7 ngua temaba jenjang nung alir Australia nunger Alex Bolt aser Andrew Whittington na madak takok ngua tebur doubles shilem indang quarterfinal-i iogo.
Ramkumar aser pa den külemi asayasang, Australia nunger John Millman natia points 6-0, 6-0 ngua America nunger Sam Barnett aser Jesse Witten na ayong ayonga tsükdakja tebur doubles shilem indang quarterfinal asayatsü jenjang ngua lir.