ICC Test Rankings: Anderson World No. 1 akümer

London, May 31 (Agencies): England nunger fast bowler, James Anderson-i külem sensopur, Stuart Broad ajangteta International Cricket Council (ICC)-i renemba Test Bowler Rankings nung World No. 1 tanü, Hombar nü kümogo.
Yashi Sri Lanka telok madak takok ngua asayaba Test asaya nung par England telok asoshi kangasa junga asayaba sülen Anderson-i tan jenjang tajungji ajangzüker lir.
Tan Sri Lanka den tasayadak asaya 3 densemba Test series nung Anderson-i ajak agi wicket 18 tashi agia, par England teloki points 2-0 agi Sri Lanka den temaba jenjang ngudakja lir.
Arishi küm 33 tain Anderson-i külem sensopur, Ian Botham, Steve Harmison aser Broad nunger den züngsema, par England tenüng nung Test Bowling tarensen nung temaba jenjang abentsü jenjang angur bowler 4 buba akümer lir.
Tan Test series asaya nung England telok asoshi wicket 10 tashi agia kanga junga asaya aka, Broad-i 2 buba jenjang nung alisang, India nunger spinner, Ravichandran Ashwin den jenjang ka agi tekübokba küma, tang 3 buba jenjang tonga luogo.
Ano külen, batsman tarensen nung Australia nunger Steve Smith-i temaba jenjang ngua lir aser pa sülen anidaka, England nunger Joe Root maneni 2 buba jenjang nung lir.
Team tarensen nunga Australia aser India na tang 1 buba aser 2 buba jenjang nung aliba osang angazükogo.