Mission aser Solomon Ken

–  Rev. I. Lanu Jamir, Missionary.

Tongmelang agi asenoki Solomon Ken (poem) ya Lai ratet-tem reprangdangra, Temeim agi mesepba   ( An intoxicating love ) ta shia lir. Tapu 8:7 nung – Tzu jenti agi temeim meremseptet, Mesura tzumetsung agi aji metsüngbangtsü makok ( Many waters cannot quench love; rivers cannot wash it away NIV ). Ano Lai ratet nungjisa , Khristaji keyimsang aser Arogoji (tamanger) Keyimla ( The Bridegroom representing Christ, the Bride, the Church ). Tapu 1:2 nungji yamai zulua lir – Aya, pa bang mesepba agi pai kü dak mesepdaktsünüali! Kechiyong yi dang nungi ne temeim tajungba. Solomon Ken nung Tapu 1 nungi 8 tashi nung tekong (verse) 117 lir aser Temeim indang 60 ben shia lir.
Ozü kibong Keonjhar, Odisha nung alidang, 1988 kum Cuttack nungi Operation Mobilization (OM) telok ita eshika amongtsü kaket-tem (Literature) aika bener aru. Anogo eshika ministry inyaka ao saka BJP, RSS teloki timtem agütsüba agi meinyaki aotsü telemtetba agi. Anungji parnoki bener aruba kakettem tongtipangsa Laishiba (English, Oriya) dalangba agi (discount) ministry atema alizüka ayu.
Iba sülen onoki Laishibatemji ministry atema tayoka ayok aser angatiasa agütsü. Iba osang angashia BJP, RSS teloka Laishibasa alii aru. Onoki parnokji item telok ta tamasabo memeteti liasü. Tesülenang ibaji meteta parnok dang nenok English Laishiba ya kechisütsüsa alir ta asüngdangdang parnoki onok English jembitsü angazüktsü alir tasa langzü. Ano parnok karibo Laishiba nung Solomon Ken  yabo meinoktsüba enok tasa ashiba bilemteter. Parnoki ashiba amaji asenokia alima shi nung dang angatettsü merangra     taaktsüka. Shibai metet aikati Solomon Ken ya mezüngi alitsüa akok. Mezungi lira sarasadema züngang. Ibai Tsungrem temeim indang züluba lir.
Solomon Ken ya Tsüngrem temeim indang züluba lir. Tsüngrem temeimji kecha dena metemdangtsü makok. Asenoki Mission indang jembiba aser inyakba ya Tsüngrem temeimji medenra tabensa masü. Yohan 3:16 nung, “Tsungremi alima oda meim nung, shibaisa Pa dak amanger mesamatsü, saka teti taküm akatsü Pai pei ajaso Chir agütsü. David Livingstone-i ashi, Tsüngrem Chir ka dang liasü aser Pai Pa Missionary ka kümdaktsü (God had an only Son and He made Him a Missionary). Solomon Ken ya iba temeim indang mejemba ken lir.
Ano Yisui  “Oang kin ajak netsung kumdakjang,” ta nungloktsubaji Tsüngrem temeimji medeniang takok mengutet. Naga nungertemi Assam, Arunachal, Odisha aser alima tesem balala nung oa Mission Field  lapoka Tenyaba mapa inyaker. Asenoki alimashi nung dang bilemdangra parnok den kechi nung tesendaktep aka… Saka Ken mejemertemi mejemba ama – Talangka nung mamangba pur lima nung, Meyirijang jenti samadaki, Shiba aotsu; Tsungrem temeim ni  shidi, Ya alimai memetet, Pa temeim tulu indang, Nemzübatem dang shidi. … Yisui ozüngsa nungloktsuba den, amangba purtemi iba Tsungrem temeimji angatetyong, nübo, mapang indoka ano rongsen jenti bener oa, nüktzü yima tokrong tia ajuruaka Tsungrem temeim osangji sangdonger. Kenü Teyanglur Tsüngremi iba sempet (Reward) asenok nem meyipa agütsütsü. Anungji asenoki maneni Khrista maru tashi Mission Mapa inyaktsü melakli aser tezü medangi inyaktsü amangba purtem ayongzüker… AMEN.