Shitakba tenzükertem

Nagaland nung sorkar tenzükertem mapai mao ita sen achiba aser ochimashi mapa inyakba mapatem indang tejembia kanga jembir aser tezülua kanga zülur, saka sorkar tenzükertem ajakbo yamaji masü. Sorkar tenzükertem karbo kanga nendaka aser ochishia inyaker. Item tenzükertem jagibo office nunga mapang talila inyaker aser pei sen dena endoka nübortem yarir. Item ama sorkar tenzükertem  jagi pei mapa aser pei office alema oagi nübortem yarir. Iba denji ano osang tajung kaji item ama shitakba nübortem tenzükertemji lanurtem teimba lir. Aji oda, tenzükertem rongnungsa süaka kodang lanurtemi tajungba, tenendakba aser ochitashiba inyakdir, iba jagi tanü mejungaka asüngbo ajungtsü ta asüba teimla ka agütsür. Item teimla agütsür lanurtem rongnung Naga nunger lanur officer pezü lir. Par pezü rongnung kaji küm 29 tain Sentilong Ozüküm. Pa ya tang Konyak lima Monyakshu nung EAC lir. Atangji, Nagaland nung EAC kati pa office-i maodang school nung angati sayuba aser office temer külen par kidang kaketshirtem dang lesson sayuba otsübo kodanga mangashidang alitsü, kechiyong EAC menden angubaji tulur menden angur aser tulur kati school tesayur ka akümtsübaji tasak. Ajisüaka, Sentilong yagibo pa alidak arogoi lapokba school ka tenüng agi Beijing School nung anepdang pa office-i maodang Science aser Maths sayur. Ano, tanurtem meyi sodi mapang pai anir tesayurtemi GHS Bumei nung lesson sayua amonger. Iba ama tenlaji koda tulu aser jangratemtsüka. Tanü putu nung sorkar mapa nung inyaker tuluba nungi tilaba tashi agi Kohima aser Dimapur nung dang lir. Aji oda, Kohima aser Dimapur nung alitsü lenmang mengutetra Mokokchung tashi nung danga alitsü meranger. Ajiserbo, Mokokchung alema anüdokleni oa alitsübo anüdoklen alirtemi dena memulunger. Iba ama putu ka nung lanur tulurtem rongnung oagi Mon ser kilometer 130 shi pilar Monyakshu ama ka nung lia kaketshirtem tajung kümdaktsütsü asoshi peisasa mulungtetter tesayur mapa dena repsema inyakbaji ajak asoshi tayongzükba tuluka asütsü. Atangji,  tangari matongdak aser melinüdak aikati junga memetetba tesem nung sorkar tenzüka alidang yangji alir tanurtem tajung kümdaktsütsü asoshi merangba lanur tulurtem rongnung ano Mon district nungsa Mopong nung EAC Yanithung Ngullie-ia GHS Mopong nung azüngertem dang paia pa office-i maodang English aser Social Studies sayur. Iba jagi taküm 2016 kümbo iba school nungi class 10 nung nisung anati takok angu. Ano, paibo pa sen agi school tanurtem nem kaket dena alitsür. Tanga tesem nung alinungbo iba ama nüngdakba tanurtem yaritsü maongka mengula ta bilema pai pa alidak tanurtem yarir. Iba kasaji ano Phek district nung tesem ka tenüng agi Phokhungri nunga EAC  Renbi Kikonia  GHS Phokhungri nung tanurtem dang lesson sayuba ajanga tanurtem schooli arunüseta arur . EAC süaka school nung tesayur mapa inyakbaji jangratema pa nem lemzüktsüba mapa ka inyaker ama bilema pai inyaker. Ano, par medemer NCS officer ka tenüng agi Nockpai Konyak-ia  Zunheboto district nung pa alidak Satoi nung lanurtem civil services tatidang agütsünertem dang lenmang sayua yariteper aser tesayur peria malidak school nung oagi yariteper. Iba  ama tanü NCS officers lanurtem rongnung gari lenmang junga malidak aser light junga marudak mulungsua oagi pei nem lemzüktsüba mapa dang masü saka nübortem nüngdak reprangteta yariba tenlaji tarutsü Nagaland asoshi tenla tulu asütsü. Iba jagi Nagaland tajungba küma yanglushitsü. Atangji, akhidang asen tsüraburtemi memetetba limatem nung tetsüng agi tonga oa school lapoktsü aser arogo tenzüktsü. Tanü iba temoatsü nung asenok alir. Ajisüaka, item temoatsütemjibo joko tagimar, anungji tarutsü anogotem asoshibo tanü lanurtemi inyaktsüla. Aji oda, tanü lanurtemi tangar mounüdak aser melinüdak oagi nübortem tenzüka parnok nüchi kümdakja jenjang yanglutsübaji asüng asoshi temoatsü kiküm lapoker asütsü. Iba ama mapa tajung jagi dang Naga nungertema longjemtsü. Item jiluji ajizüka lanurtem ajaki inyaktsü ajungshir.