ISL: Adrina Mutu FC Pune City nung anioksemogo

New Delhi, July 30 (Agencies): 2016 Indian Premier League (IPL) football asayamong nung tongti shilem agidaktsütsü nükjidong nung FC Pune City (FCPC) teloki Romania nunger Adrian Mutu par telok nung tanü Brehostibar nü aniokogo.

Par telok jenjang tajungba kümdaktsütsü aser tanüngba asayartem ajungmesotsü nükla yur külen, FCPC teloki taoba Juventus aser Fiorentina asayar, Mutu ya par telok nung anioksemer lir.

FCPC teloki Ivory Coast nunger asayar mongin, Didier Zokora-a par telok nung anioksema aliba osang jangjaogo.

Arishi küm 34 tain defender, Zokora-i World Cup asayamong nung anaben tashi shilem agiba densema tanü tashi nung par linük tenüng nung asaya 123 tashi nung shilem agiba osang bushiteta lir.

Taoba mapang Romanian Footballer of the Year sempet 4 ben tashi agizüksang, Mutu-i football asayatsü tenzüker tanü tashi nung ajak agi goal 160 tashi takok ngua agüja lir.

2009-10 Coppa Italia top scorer sempeta agizüksang, Mutu-i kanga junga asaya aka, tashi tali itshitsü mozü achiba puteta pa 2004 küm Chelsea telok nungi agiena liasü.

Ajisüaka, pai PCFC telok nung züngsema asayaba ajanga pa taküm aser football asayatsü jenjang tajungba akümtsü ta pa dak tamang akatsü tenzükogo.

 “Mutu ya football asayar mongin ka lir aser pa den külemi lungjemer FCPC jenjang tajungba kümdaktsütsü asoshi jangrar,” ta FCPC head coach, David Platt-ia metetdaktsü.