Djokovic senpet sen mn 100 agizüker asayar 1 buba akümer

Paris, June 01 (Agencies): Serbia nunger Novak Djokovic-i par 4 round asaya koka tang tasayadak French Open asayamong tebur singles quarterfinal asayatsü jenjang tanü, Bodbar nü ajangzükogo.
Tebur World No. 1, Djiokovic-i yashi o tanü na tsüngda nung points 3-6 6-4 6-1 7-5 ngua, Spain nunger Roberto Bautista Agut madak takok ngua jenjang tajungji ajangzük.
Djokovic-i tanü quarterfinal asayatsü jenjang anguba den külemi, tebur tennis asayar rong nung senpet sen dollar sen million 100 agizüker asayar mezüngbuba küma otsü yangluogo.
Arishi küm 29 tain Djokovic-i tanü 4 buba round asaya akokba senpet sen agizükba sülen otsü tasenji yanglua liasü.
Tzünglu kanga sashia aruba ajanga tetsür World No. 1, Serena Williams-ia ghonda 48 shi nung ang par 4 buba round asaya koka tetsür singles quarterfinal asayatsü jenjang ajangzükogo.
America tsür, Serena-i points 6-1 6-1 ngua tan asayamong nung 18 buba jenjang abenla, Ukraine tsür, Elina Svitolina 4 round nung tsükdaktsü.
Serena-i Spain tsür, Carla Suarez Navarro madak takok angur, Kazakhstan tsür, Yulia Putintseva den quarterfinal asayatsü.
Ajisüaka, Serena teyi, Venus Williams-i tanü tamakok ajuruba osang jangjaogo.
Switzerland tsür, Timea Bacsinszky-i tanü points 6-2 6-4 agi Venus tsükdaktsüba sülen Netherlands tsür, Kiki Berten den taruba asaya asayatsü lemzükogo.
Ano külen, India nunger Rohan Bopanna aser Romania nunger Florin Mergea natia tanü tamakok ajuruba osang angazükogo.
Croatia nunger Ivan Dodig aser Brazil nunger Marcelo Melo nati tanü points 6-4, 6-4 ngua Bopanna o Mergea na tebur doubles quarterfinal asaya nung tsükdaktsü.