Tir tasen shimba ajanga FIFA’er timtem mesamatsü: Thomas Bach

Kuala Lumpur, July 30 (Agencies): Tir tasen shimba sülena tang tashishitsü ken o ajurushiba FIFA-i par timtem maneni ajurutsü ta International Olympic Committee (IOC) Tir, Thomas Bach-i tanü Brehostibar nü metetdaktsüogo.

“Tir tasen shimba ajanga masü saka temelenshi tajung agia kechisarena ajunga  ochishia inyakba ajanga dang FIFA-i par tashishitsü ken o ajunga agientettsü,” ta Bach-i ashi.

Tang FIFA Tir menden abensang, Sepp Blatter melenzüka Tir tasenba shimtsü election sangküm 2016 February ita agitsü renema lir.

FIFA Tir menden asoshi candidate ka ama tokteptsü lemtetba osang ka UEFA lenisang, Michel Platini-ia yashi, Bodbar nü sangoktsüogo.

FIFA-i par Congress senden taküm May ita 27 nü agiba jakdang ochimashi inyakba aser süpokrem sen agiba ken o nung ajemdaker par tongti ketdangser 7 tashi police-i apuba ajanga alima ajunga nung football ketdang asüba tenteti maksü tulu ajurua liasü.

2022 Winter Olympics asayamong ayongtsü temeten Beijing, China aser Almaty, Kazakhstan na rong nung ka nem agütsütsü telemtetba agitsü asoshi IOC senden ka tanü ayonga amendang Bach-i FIFA-i temelenshi nungdakba osangji lemsatep.

US kübok Salt Lake City nem 2002 Winter Games ayongtsü temeten agütsütsü melena IOC ketdangsertemi ozüng alema süpokrem sen agiba osang bushitetba sülen IOC-ia par tentet tajungba küma melenshitsü maparen tenzüka liasü.

 “Ozü IOC-i ajangshiba ama, nüburtemi tanaben temulung lemtettsüsa temelenshi agitsü atema mapang agir. Ajisüaka, temelenshi agitsü tenzükba ajanga tanübo IOC taoba mapang nungi kangasa tajungba kümogo,” ta Bach-i ashi.