Phek aser Peren nunga World No Tobacco day among

Dimapur, June 1 (TYO) : May 31, 2016 nü Phek DC conference hall nung World No Tobacco day sentong ayongzüka amung. Iba sentong nung tongti tesemdangerji Phek Deputy Commissioner, Muruho Chotso liasü.

Tongti tesemdangeri o jembidang ashiba agi, tsürabur shingaia tanur dang moko achitsü mesayur saka pei sasa achitsü tenzüker.

Moko achiba indang temetettsü ya asen loktiliba nung kanga junga metetdaktsütsüla aser public tesem nung moko achirtem ozüng agi merenshitsüla, ta Muruho Chotso-isa ashi.

Sentong nung mendenji T. Yanger Jamir EAC, Phek liasü, Dr. Reyosalulave Vizo, District Nodal Officer & NTCP-i moko ajanga timtem agütsüba indang onük jembi aser Dr. Katoni Jakhalu, Principal Phek Government College-i anküp tepela o jembi.

District hospital Peren nunga World No Tobacco Day ayongzüka amung aser iba sentong nung tongti tesemdangerji ADC Peren, Tainiu liasü.

Moko achiba ajanga kibong nung aser loktiliba nung khuret bener arutsür, anungji nisung ajaki moko ajanga takoksa bener arutsübatem indang meteta alitsüla, ta tongti tesemdangerisa metetdaktsü.

Sentong nung mendenji Dr. Tiala Longkumer liasü, Dr. Atsungla-i okila jembi aser Dr. Sabino-i anküp tepela o jembi. Sentong nung Peren Town Students Union, GBs, Town committee züngsemtem aser tanga ketdangdsertem aden.