Bosnia nung David Bowie noksa ka sayaogo

June 02, 2016: Bosnia yimtiba, Sarajevo nung nüngtugu kentener asür, Dawid Bowie nüngtem nung noksa tulu ka sayaogo.

Local artist anati iba noksaji yanglua liasü. Iba noksa yanglutsü atema Bosnia nunger kentener Vedad Trebonja-i tasa agüja liasü.

Iba noksaji tasazük lenden-metong nung feet 43 aser feet 34 (metre 13 x metre 10.5) lir.

Enis Cisic aser Zoran Herceg nati hopta trok agia iba noksa yanglua liasü.

Iba noksa nung Bowie tejak nung ‘tsüngperet yaloktsüba’ noksa lir aser kasa noksa nung “Heroes”‘ aser ‘Fashion’ ken den “Fashion melenshir, saka na teti onok hero asütsü,” ta zülua lir.

May 28, 2016 nü iba noksa sayaba sentong nung Bowie sapurtem jenti adenshia liasü. Iba project ya Bosnia nunger merirjang jenti den Bowie den külemi inyaksemertemi nungita inyaka liasü.

Taküm January ita nung Bowie arishi küm 69 nung cancer tashitak ajanga asü.

1994 küm pai artist, Peter Howson-i rara anema yangluba painting ka alizüka liasü, iba noksaji Bosnia nunger Muslim tsür ka tashiyim amshia raksatsüba noksa lir. Ajisüaka pai pa akumli mapang Sarajevo kodanga mesemdangi liasü.