Germany yimsüsürtemi Turkey linük jashidaktsür

Germany nung tentetba Greens Party (Die Gruenen) yimtenren telok nungi yimsüsür, Cem Oezdemir-i Germany kübok Berlin nung tentetba parliament lower house, Bundestag senden nung onük jembiba noksa nung angur. Tesüiba mapang, 1915 nung Turkey nunger Ottoman mitkartemi Armenia nunger jenti khen nung tepsetba maparen kin kidong, tamangba yimsü aser yimtenren tebilemba dak ajemdaker tepset ta tanü senden nung shilem agir Germany yimsüsürtemi lemteta liasü. (Berlin, June 02)

 Berlin, June 02 (Agencies): Tesüiba mapang, 1915 nung Turkey nunger Ottoman mitkartemi Armenia nunger jenti khen nung tepsetba maparen kin kidong, tamangba yimsü aser yimtenren tebilemba dak ajemdaker tepset ta Germany yimsüsürtemi tenüng agi telemtetba ka tanü, Brehostibar nü agiba ajanga Turkey linük jashidaktsüba osang angazükogo.

Tesüiba mapang, World War II (WWII) sülen Europe-i tan mezüngsüa migrant aser refugee nisungtem den sentakba khuret tulu ajurua, kasaji bentettsü atema Turkey teyari nungdaka aliba mapang ka nung Germany yimsüsürtemi Turkey jashidaktsütsüsa tan telemtetbaji agir lir.

Ajisüaka, “WWI nung Ottoman mitkartemi Amernia nunger Khristanpur tespetji tamangba yimsü dak ajemdaker tepsetba masü,” ta Turkey nung tentetba Justice & Development Party (AK) yimtenren telok otongdari metetdaktsüogo.

“Germany yimsüsürtemi tan telemtetba agibaji tamendakdak maliba telemtetba ka lir. Iba telemtetba agiba ajanga North Atlantic Treaty Organization (NATO) nung züngsemba linüktem aser ozü Turkey na tsüngda tesendaktep mejungi kümdaktsütsü,” ta Turkey Ato Kilonser, Binali Yildirim-ia metetdaktsü.

Ano külen, German Chancellor, Angela Merkel-i ayonger külen Turkey nüburtem nem Europe ajunga nung visa mamshi senzütsü aser Turkey European Union (EU) nung züngsemtsü temeten agütsütsü melena Europe talisa, Greece nung jenoka alir migrant nisungtem Turkey nung jenokdaktsütsü asoshi EU aser Turkey nati tezüngzüktep agia lir.

Ajisüaka, tan Germany yimsüsürtemi par telemtetba agiba ajanga Turkey aser EU na tsüngda agiba tezüngzüktepjia raksatsüsa tarutsü anogotem nung jenjang ajurutsü akok.

Ottoman mitkartemi Armenia nüburtem tepsetba onükji tashishitsü aketba onük ka asüba yong Germany yimsüsürtemi tanü telemtetba agiba maparen nung Merkel, lar foreign minister aser lar vice chancellor nungeri vote agüja shilem magiba osanga angazükogo.

France densema, EU nung züngsemba linük 12 dak temai tan Germany yimsüsürtemi agiba telemtetba mesükba telemtetbatem taoba mapang agia lir.