Modi aser LG-i Delhi sorkar atema tetsükdaktsü agütsür: Kejriwal

New Delhi, June 02 (Agencies): Brihostibarnü Delhi Chief Minister, Arvind Kejriwal-i Ato kilonser, Narendra Modi aser Lt. Governor, Najeeb Jung nati yimti sorkar atema tetsükdaktsü bener arutsür ta aitsü.

“LG aser Modi sorkari file ajak nung Delhi sorkar nem tetsükdaktsü bener arutsü tenzükogo,” ta Kejriwal-i twitter ajanga ashi.

Lt. Governor-i Delhi sorkar indang ‘app based premium bus service’ registration inyakyim atema temelaba magütsüba sülen anogo ka lir Delhi Chief minister-i iba o jembiogo.

Modi sorkari LG ajanga Delhi sorkar indang project balala nokdanger ta aija Kejriwal-i, “Delhi sorkar mapa ajak nokdangtsü atema LG ajanga Modi-i injang akar,” ta ashi.

Taküm April 15 nungi April 30 nü tashi odd-even scheme tanabenren benokdang Delhi sorkari ‘app-based premium bus service’ atema sangdonga liasü, aser iba atemaji yashi nungi registration tenzüktsü liasü, ajisüaka LG-i iba atema temelaba magütsü.

May 20 nü iba scheme atema temetetdaktsüba ka agütsü saka Lt. Governor-i ibaji magizükba ajanga iba project metenzükteter.