Vatican summit-i nisung shibelenba anema raratsü nangzüker

Vatican City, June 03 (Agencies): Vatican kübok Vatican City nung ayongba Vatican Summit senden nung shilem agir alima o bendanger aser prosecutor-temi ozüng alema nisung shibelenba anema raratsüren nung yariteptsü nangzüktepogo.

Alima ajunga nung Roman Catholic tamangba yimsü benshir lenisang, Pope Francis-i ayonger külen tan Vatican Summit sendenji amenba osang jangjaogo.

Tan senden nung shilem agir o bendanger, prosecutor aser ozüng ketdangser 100 shi Francis den ozüng alema nisung shibelenba aser telok tenteta ozüng alema inyakertem anema raratsü asoshi tezüngzüktep zülutepa agiba osanga jangjaogo.

“Ozüng alema nisung shibelenba, tashiyim agi mapa inyakdaktsüba aser pei tekep yokdaktsüba maparen ajunga meimchir anema inyakba maparen lir,” ta bangjema, tan senden nung shilem agirtemi ozüng alema inyakertem anema raratsü nangzükteper lir.

Latin America nungi Pope akümtsü jenjang mezüng angur, Francis-i pa lenisüba kübok ozüng alema nisung shibelenba aser alima tesem balala nung nübur bendanga amshiba anema nokdaktsü aser refugee o sensaker nisungtem taküm jenjang tajungba kümdaktsütsü alizüng yua lir.