Carter-i Shangri-La Dialogue senden nung shilem agir

Singapore, June 03 (Agencies): Singapore nung ayongba Shangri-La Dialogue senden nung US Defense Sectertary, Ash Carter-i shilem agiba osang angazükogo.

Shangri-La Dialogue senden ya Asia nung kümshi ayongba lendongtsüdong nungi kümzüka alitsü senden tulutiba lir aser iba senden nung alima ajunga nungi defense minister aser mitkar lenirtemi shilem agir.

Tanü nungi tenzüka, anogo 3 tashi amentsü ayongba Shangri-La senden nung shilem agia, Cater-i asüng, Honibar nü onük jembitsü renema lir.

Tan senden nung shilem agirtemi China-i South China Sea (SCS) nung par mitkar tashi tali itshitsü maparen kanga sashia inyakba onük tongtipangsüa benoka jembitsü sentong lir.

“China-i SCS nung asetkong tenteta par mitkar tashi tali itshitsü mapatong kanga sashia inyakba ajanga par linüki alima ajunga nungi pila alitsü lungnang anangtsü tenzüker lir,” ta Carter-i taoba hopta metetdakja liasü.

SCS shilem tuluba ka par meyong ta China-i züngshia, yaküm 2015 küm nungi tenzüka SCS nung asetkong tilatem tenteta idakji par mitkar tesep tentettsü mapatong tenzüka lir.

Ajisaüaka, par linüki yamaji inyakba ajanga China aser Philippines o Vietnam na densema, kidangsüa aliba linüktem den mangatettep ken o adoka lir.

Ano, Philippines linüki China den adokba mangatettep ken o bentettsütsü asoshi United Nations (UN) tashi nung ken o benoka lir saka UN-i SCS ken o nung ajemdaker agütsüba obendang magizüktsü renemba osang ka China-ia metetdaktsüogo.

SCS ken o den külemi, North Korea-i par tongpang nung amshitsü nuclear osettsüset tendanga Korean peninsula nung tensa mejungi kümdaktsüba, US aser China na tsüngda tesendaktep mejungi akümba aser Islamic State (IS) kiralongrar telok Asia nung tashi aitsü tenzükba onüktema tan senden nung shilem agirtemi benoka jembitsü renemogo.