Tashiyim agi tetsür merenshiba temerenshi küm 10 tepuokdak ayutsü

Dimapur, July 30 (TYO): 2012 küm May 2 nü nisung ka tenüng agi Mithun Prasad-i küm terka tetsür chanu ka dak tashiyim agi mapa tamajung inyakba temerenshi küm ter tepuokdak ayutsü asoshi tanü Brehostibar nü yangi Dimapur nung District  aser Sessions Court nung obendangeri obendang agütsüogo.

Iba nisungba jagi tashiyim amshia merenshila tetsür chanulaji pa kinüngtsü jala liasü.

Iba obendang agütsüba mapang, obendanger Wb. Neiko Kanuo-i ashiba agi, iba tatalokba maparen nungbo kecha terata melii obendang agütsüogo. Tetsür chanulaji pa kinüngtsü jala asünungji, tebu kati ano kidang alir tanur ana tangaleni yoker tetsür chanu ka dak tashiyim agi mapa  tamajung inyakbajibo meteta inyakba mapa lir, ibaji tebu kati inyakba khenyongi memesük, ta obendangerisa ashi.

Iba ama nisung tain kibong kümer kati inyakba mapa alang temerenshi tulutiba agütsütsüla, anungji aibelensangji küm ter tepuokdak ayutsü asoshi obendang agütsür, ta paisa metetdaktsü.