NSF-i Naga nunger HSLC toppers 28 nem tetushi agütsü

June 3, 2016 nü Zonal council hall, Kohima nung NSF-i HSLC Examination 2016 nung Naga nunger toppers nem tetushi agütsüba sentong nung Naga nunger topper tem Chief Secretary, Pankaj Kumar aser NSF ketdangsertem den külemi tangokba noksa ka angur.

Kohima, June 03 (Agencies): Tanü Zonal council hall, Kohima nung Naga Students’ Federation (NSF)-i NBSE-i achaayanga agiba HSLC examination 2016 nung Naga nunger toppers nem tetushi agütsüogo.

Iba sentong nung jembidang Chief Secretary, Pankaj Kumar-i, kaketshir kati takok ngutetbaji kuli aika lir aser parnoki tarutsü nung itemji wazüka benshitsüla, ta ashi.

Paisa, takok angutsü atema nisung kati nükjidong ka ayutsüla, aser khen nung mera ka agitsüla, ta ashi.

“Nisung ka kodang temaba jenjangi tudir aser temaba jenjang nung nokdakdir mangdangji angur, anungji topper temi tang takok anguba kija nung temulung mesüi temaba nükjidong arishitsüla,” ta paisa ashi.

Kasa sentong nung NSF Tir, Subenthung Kithan-ia, Naga nunger HSLC toppers tushiba ya school aser tsüraburtem atema dang masü saka NSF atema nümadangtsü ka lir, ta ashi.

NSF Tirisa kaketshirtem dang Tsüngrem tsübutsü aser pei nükjidong atongtsü atema tajungtiba nung meranga inyaktsü ajungshi.

Manipur board of school Education nung Naga nunger topper ka densema HSLC exam 2016 nung Naga nunger toppers ajak agi parnok 28 nem NSF-i tetushi agütsü. Iba sentong nung Chief Secretary, toppers tsüraburtem, kaketshir lenirtem aser temulungertem dena liasü.

Iba sentong ya NSF Speaker, Joshua Thong lenisüba nung agi aser Phom Baptist Church Kohima, Pastor, Rev Phomlee Van-i sarasadema sentong tenzüka liasü.

NSF Secretary Information, Menang Longchar-i toppers tem metetdaktsü aser toppers tenüng nung Edith Douglas, Mokokchung nungi Top 6 jenjang angur, Phepon P Meya-i jembi.

Secretary Education NSF Imtiyapang-i anir toppers nem tetushi agütsü aser Secretary Social & Cultural NSF, Boketo Kiho-i tepela anküp o jembia liasü.