PM Modi-i Afghanistan nung Salma Dam lapoktsü

June 04, 2016 nü Heart, Afghanistan nung India Ato Kilonser, Narendra Modi aser Afghanistan Tir, Mohammad Ashraf Ghani nati Afghan-India Friendship Dam (Salma Dam) lapoktsüba noksa angur.

Heart (Afghanistan), June 04 (Agencies): Honibarnü Ato kilonser, Narendra Modi aser Afghanistan Tir, Ashraf Ghani nati sen crore 1700 indang  project, Salma Dam  lapoktsüogo.
Iba project atema India-i senotsü agia yaria liasü.
Afghan-India Friendship Dam dang ya tamasabo Salma Dam ta jaa liasü. Iba dam ya kidanger linük Iran arrtsülen Heart nung aliba Chist-e-Sharif ayong nung lir.
Iba dam gross capacity ji 633 million cubic metres lir,  metong nung metre 104.3, metre 540 talang aser  tsünglanglen metre 450 lir. Iba dam ajanga ali tasazük hectare 75,000 nung tzü agütsütettsü aser power 42 MW adokdaktsütettsü.
Modi-i linük pongu semdangtsü apuso ogo. Ita trok tsüngda Modi-i tang agi anabenbuba iba linük semdanger. Herat jila nungi kilometer 165 shi pilar aliba dam ya ajanga iba province nung aluyimba tsütsü rongsenkettsüng jenjang ajungketttsü imlar.
Iba dam lapoktsüba sülen Modi-i, “Iba dam ya lungro aser mortar agi yangluba masü saka asen tembar tamang aser Afghanistan o India na tashi agi yanglu,” ta ashi.
Iba project ya India sorkar, Union ministry of WAPCOS Limited-i yanglu.
Modi-i, “Onoki tesem ka asentenshitsür, taküm tasen kümdaktsür, teimla agütsür aser Afghanistan tarutsü tia yanglutsür,” ta ashi.
Afghan linüki kiralongraba anemba atema tenüngsanga Modi-i, nenok tsüngda telemsa lira, ibaji ajanga temalen nungi linük atsüngtsü merangertem ang yaritsü, ta ashi.
“Iba ya Afghan-i adokdaktsüba rara ka masü, saka iba ya ajanga Afghan nunger tarutsü putu auyadaktsür,” ta Modi-i ashi.
“Afghan nungeri tarutsü azükaru puto ka yangertsü lemtetba atema akhüm agütsütsü asoshi tanübo asenok longjemer benjungteper,” ta paisa ashi.
Tanü Modi nem Afghanistan nunger tematiba civilian award, Amir Amanullah Khan Award agütsü.
Tanep osangbenertem senden nung jembidang Afghan Tir, Ghani-i, “India aser Afghan teti atema tesentaktep yanglutsü atema tanü asenok longjemer,” ta ashi.
Modi agizüka Ghani-i, “Nü tanabuba ki, Afghanistan nung pelaa agizüker,” ta ashi.
“Nenoki mapang talangka nungi Afghan atema mangdang aliba küm 30 sülen tanübo ibaji atalokogo,” ta Ghani-isa ashi.
India nem tenüngsang agüja Afghan Tir-i, “Salma Dam ajanga amalitep aser azükaru nung otsü tasen ka tenzüktsü,” ta ashi.
Modi nüngtem nung Tir Ghani-i ayongba chiyung benjung nung adenba sülen Modi Doha, Qatar-i aotsü aser yangji pai Qatar Ato kilonser, Abdullah Bin Nasser Bin Khalifa Al Thani ajurutsü.
Modi-i linük pongu- Afghanistan, Qatar, Switzerland, US aser Mexico semdangtsü, aser iba mapang nung pai shishilembaba, energy aser security nung amaliteptsü atema ken o jembitsü iba den külemi Nuclear Suppliers Group (NSG) nung India züngsem ka akümtsü atema teyari meshitsü.