Boko Haram teloki Niger mitkar 32 tepset: Defence Ministry

Niamey, June 04 (Agencies): Nigeria sorkar anema raraba Boko Haram kiralongrar teloki Niger mitkar züngsem 32 tashi Niger linük arrtsülen tepsetba osang ka Niger defence ministry-i tanü, Honibar nü metetdaktsüogo.
“Kiralongrar noklang aikati Niger arrtsülen, Bosso nung tentetba mitkar tesep yashi, Hokolbar nikongtsütsü amakba osang jangjaogo,” ta ministry-i ashi.
“Tan lendong nung mitkar züngsem 32 asüba aser parnok nisung 67 shi yiruba osang tang tashi nung jangjaogo,” ta ministry-i osang jangjashitsü.
Ministry-isa ashiba agi, Niger mitkartemia kiralongrartemji mita arishiba sülen parnoki tanep, Honibar anepdang tashi nung  Bosso jila ajunga kiralongrar ket nungi tanaben agiogo.
Nigeria den kidangsüa aliba Niger linük nung talisa, par linük southeast tsütsülen densemba tesemtem nung Boko Haram teloki 2015 küm February ita nungi tenzüka tanü tashi amakba lendong mapang shia atalokdaktsüba osang bushiteta lir.
Nigeria ajunga nung Islam tamangba yimsü benoktsü meranger Boko Haram teloki Nigeria sorkar den raraba ajanga tanü tashi nung ishiba agi nisung 20,000 shi tepsetba aser nisung million 2.6 dak temai pei talidak toktsütsüsa akümba osanga bushitetogo.