US-i South Korea nungita yaritsü nangzüker: Carter

Singapore nung temendak 15 buba International Institute for Strategic Studies Shangri-la Dialogue senden tezülen jurila senden ka amenba jakdang U.S. Defense Secretary, Ash Carter (Abelen) aser South Korea Defense Minister, Han Min Koo nati teka amtepa ajurudang agiba noksa ka yangi angur. (Singapore, June 04)

Singapore, June 04 (Agencies): US Defense Secretary aser South Korea Defense Minister, Han Minkoo nati tanü senden ka mena, Asia nung tensa azüoka ayutsü onük benoka jembiogo.
Tang Singapore nung temendak Asia nung kümshi ayongba tensa azüoktsü senden tulutiba, Shangri-La Dialogue senden tezülen ajurutepa, Carter o Minkoo nati tanü jurila senden amendang iba onükji benoka liasü.
Tanü senden nung lenir anati North Korea-i tashishitsü aketba tongpang nung amshitsü nuclear tongpang oset yanglua tendangba maparen aitsüba den külemi, par linüki nuclear mapatong anentsü tayongzükba olen ka metedaktsü.
“N Korea-i par tongpang nung amshitsü missile aser nuclear osettsüset yanglua tendangba aser kasaji rizüngba maparen anentsü ajungshir,” ta Carter o Minkoo nati osangbener den aroki ajurutepdang sangoktsü.
Ano, S Korea linük kümzüka ayutsü mapatong nung US-i taoba mapang nangzükba ama, par linük nungita yaritsü tenangzükba olen ka Carter-i tanü nenshia metetdaktsü.
Korea linük ana tsüngda adokba mangatettepbaren bentettsü nükjidong nung Pyongyang-i Seoul den taoba May tatemlen mesüra tan June ita tetenzüklen senden amentsü ayong saka Seoul-i iba onükji magizüki süidaktsüogo.
“Pyongyang-i par nuclear mapatong anentsü nükjidong nung masü saka Pyongyang-i nuclear osettsüset tendangba ken o dak ajemdaker alimai aroki lungjemer par linük anema benokba tenokdangba sentongtem agiendaktsütsü nükjidong nung Korea linük ana tsüngda yimjung senden amentsü onük benok. Iba yongji ozü linüki iba onükji magizüki süidaktsüogo,” ta S Korea’er Defense Ministry-i osang jangjashitsü.
Korea linük ana tsüngda 1950s mapang raraba tongpang yimjung tezüngzüktep agiba ajanga masü saka meraratsü nangzüktepba ajanga tembangba yong par linük ana tsüngda tangasa tensa mejungi aliba osang bushitetogo.
Ano külen, N Korea nungi kümzütsü maparen nung Seoul yaritsü nükjidong nung US-i par mitkar züngsem 28,500 shi tang S Korea nung yuja lir.