Nagaland kübok tesem balala nung World Environment Day amung

Dimapur, June 4 (TYO) : World Environment Day tenüng nung Nagaland kübok district aser sub-division balala nung sentongtem ayongzüka mungogo. Taküm June 5 anogo Deobar denjiba agi sorkar kübok department aser office balalai tanü Honibarnü iba anogomung jelia ayongzüka amung.
June 4, 2016 nü Dimapur district nung sorkar department temi pei pei tesem nung lokti nübodoka mapa inyaka amung.
Tanü department balalai pei office temeket merükmejuba den kilentzü aodak lapoka aser kilung o temeket merükteta inyak.
Ano, Dimapur district nung dokan kiburtemia pei pei telongtet nung merükmejuba mapa inyak.
Mokokchung jila nung Honibarnep 6:00 ako nungi 8:00 tashi lokti nübodoka mapa inyak aser iba nung Mokokchung nung aliba ward 18, rejutem aser department ajaki shilem agi.
April 2016 nungi tenzüka Forest Department-i Mokokchung district nung kija, school, colony lanurtem, department balala, Arogotem, Arm forces aser kaketshir tentet balala nem süngdong lema agütsür aser angazükba agi parnoki süngdong 16000 den tema lemogo aser ano maneni taküm July ita tashi alemtsü.
Peren district kübok aliba jila aser yimtsüngtem nunga nübortemi Honibarnü nübodoka mapa inyakogo.
Peren jila nung ADC Peren, S. Tainiu-i lenisüba nung Head of Offices, colonies, Peren Town Women Welfare Organisation, (PTWWO) Peren Town Youth Organisation, (PTYO) nungertemi merükmejuba mapa inyak.
Zunheboto jila nunga tanep 6:00 ako nungi Colony/sector 11 nung nübortemi merükmeju mapa inyak aser pei pei telongtet nung GB temi mapa ketdangsüa reprang.
Mon nunga ‘I Love My Mon Town’ mapatong kübok District Administration-i tanep lokti nübodoka mapa inyakba sentong ayongzüka agi.
Mon DC, W. Honje Konyak-i anir ketdangsertemia iba mapa nung shilem agi aser Forest Department den Administration aser Officers’ club nungeri süngdong tema ao.
Iba sentong nung NGOs, 33AR, DEF Mon aser local tentettemi shilem agi aser ano MTC, PWD(R&B), DEF, PHED, GREF, VG o Pumin nungeri jana bendena endoktsü atema gari ka ka tenla agüja liasü.
Honibarnep Phek jila nung merükmeju mapa inyakba nung sorkar mapa inyakertem aser kaketshirtem den nübortemi pei pei kiyong aser temekettem merükteta amung.
Tuensang District nunga World Environment Day 2016 cum Swatch Bharat Mission Cleanliness drive sentong ayongzüka agi. Iba sentong nung District head Offices, Central Security forces, GBs aser ward ajak nungi ketdangsertem aden.
Sentong nung SDO (C) Tuensang, Dr. Manazir J Samoom IAS menden liasü aser pai World Environment Day amungba indang osang metetdaktsü. Sentong nungsa DFO Tuensang, Dr. Sentitula, IFS-i okila jembi aser Tuensang DC, Alem Jongshi-i World Environment Day 2016 yimyim ayimoktsü.
June 4, 2016 nü Kiphire nunga World Environment Day nüngtem nung merükmejuba mapa inyak.
Mokokchung district kübok Mangkolemba jila nunga “Join the Race to make the World a Better Place” omen nung ajemdaker World Environment Day amung. Iba anogomung tenüng nung lokti nübodoka mapa inyakba den süngdong atem. Sub Division kübok süngdong aser metsüjang 5000 den tema lema agütsü.
Mangkolemba nung ADC Hq amenoker küm 25 ajungba jubileemung den külemi iba sentong ya ayongzüka agi aser Department of Agriculture, Forest & Soil-i UNDP (GEF) den yaritepa ayongzük.
Changtongya Sub-division nunga June 4, 2016 nü lokti nübodoka mapa inyakba den süngdong atem aser iba mapa nung ward, colony aser sorkar office tem nungi nisungtemi shilem agia liasü.
Ano, Medziphema Sub-division, Akuluto town aser Satakha town nunga World Environment Day amungba indang osang sangdong balala ajanga metetdaktsü.
Honibarnü Department of Employment, Skill Development & Entrepreneurship Nagaland, Kohima-ia World Environment Day sentong ayongzüka amung aser iba sentong nung for Labour & Employment, Skill Development & Entrepreneurship & Border Affairs Parliamentary Secretary, Mhonlumo Kikon aser Additional Director Y. Vandanshan Lotha nati anir Directorate, Regional Employment Exchange, Kohima & Govt. Industrial Training Institute, Kohima nung ketdangser aser staff tem aden.