Revivalji nisung sentong masü aser nisungi mulungba ama masü

Revivalji nisungi yimlaba ama aser nisungi yangluba sentong nung marutsüa akok, kechiaser alima rangben mesüra lokti aser kija taküm melenshitsü tashijibo Tsungrem ket nung dang lir, aser Pai mulungba ama, Pai mulungba mapang nung asentenshi milakji yoker ta asenoki metettsüla. Tsüngrem dang mepishitsü aser sarasademtsübaji asen mapa ta angateta teyimla tulu nung tanü asen Aor Revial sayutsüngirtem, counsellortem aser sarasadem nung jangrartemi asen limai Revival milak tulu ka yokang ta sarasademer, aser Tsüngremi asenok sarasademji kenübosa langzütsü ta imlaa atar. Iba sentong nungya shinga kibur ka mesüra lenir ka mali, saka onok telok parnok telok ta telemsa makai tamangertem rongnung tejangrartemi Tsungrem dang sarasademer. Iba mapa nung Arogo, lokti, kija aser kibongtemi tanü tashi nungita yariba asoshi nenok ajak dang kanga pelaba Sayutsungirtem ajak tenung nung metetdaktsür. Ashiko, Tsüngremi asenok sarasadem langzüdangji koba ama mapang ka mesüra koba tesem ka nungi shir ajanga iba sentongji tenzüktsü Pai dang meteta lir. Anungji, onok ajanga mesüra ni ajanga ta masü saka amangba purtem Arogo, lokti balala aser kija shiai Tsungrem dang asen lima aser nübortem kümzükang ta maneni sarasademba den sentong balala yanglua Tsungrem liro ataa temenen tongpang nung rarar walunir kaka asütsü asen Aor tamangertem ajak dangi Kibuba Yisu Khrista, Tanela Temeshi aser Tebu Tsüngrem tenüng nung ayongzüker.

Kibubar mapa nung pusemer,
Meren Emkong, Missionary,
Dimapur, Nagaland.