Anogo 40 nü asentenshi, tasemnü sentep osang

Dimapur, June 04 (TYO) : Tang Lifespring Corner, Dimapur nung tagidak aliba anogo 40 nü asentenshi sentong tasemnübuba nung o jembir, Mr Meren Jamir-i, “Onoki Tsüngrem dang Nagaland nung ano asentenshi khen atalokdakjang ta asüngdangogo,” ta ashi.
Anogo 40 asentenshi sentong atema jembiba mapang, pai, “Mamangertem aser pur bendanger karibo ibai shisa maka mapa amai bilemtsü akok, ajisüaka iba sentong tulu ayongba ya Tsüngremi ashi angarba lir,” ta ashi.
Paul-i I Korint 1:18 nung “Kechiyong shirnok samadagi, parnok asoshi kangki oji tamashi o, saka asenok kümzüka alirtem asoshi ibaji Tsüngrem ain lir, ta Korint nunger dang ashiba lai nung ajemdaker o jembiri, Tanela-i tuyuba mapa inyakba dang tang tensa nung shisa maka mapa ta aikati aija ashir, ta ashi.
Iba asentenshi sentong ya June 1, 2016 nü nungi tenzük aser July 10, 2016 nü tembangtsü. Iba sentong ya Lifespring Corner, Dimapur nung nikongdang shia 4:30 ako nungi tenzüka akar.
Sentong nung Arogo balala nungi Tsüngrem O jembir den tetushi aser tekülem ken anirtem jaoka shilem agitsü.