Mangkolemba SDPDB-i HSLC & HSSLC takok angur nem tenüngsang agütsü

Dimapur, June 6 (TYO) : June 6, 2016 nü Mangkolemba Sub Division Planning Development Board senden nung school ana -GHS Longchem aser Mission School Changki den BHSS, MBA nungi Nokmanenba Imsong nunger nem tenüngsang agütsü.
Taküm HSLC aser HSSLC tatidang nung 100% pass percentage anguba atema SDPDB Mangkolemba-i tan mezüng school ana nem aser Nokmanenba Imsong-i Ao oshi nung tematiba jenjang anguba atema certificate of Excellence agütsüogo.
Sendenji ADC Office nung SDPDB Vice Chairman & ADC, Imtiwapang Aier menden ser agi.
Tawa lokti nübodoka inyakba aser süngdong atemba maparen nung shilem tajung agiba atema Imtiwapang Aier-i ketdangser ajak dang pelaba metetdaktsü.
Yimtsüng balalai tesayurtem peria maliba aser school tem lapoktsü onüktem benokba atema olemtepba sülen itemji temaba ketdangsertem dangi abentsü lemtet.
Bangdakpur dangi abentsü shimba onüktem rongnung, Sub-Education Officer Mangkolemba kübok GMS/GPS nung Hindi tesayurtem nüngdakba, tawa recognised asüba Vikuto yimtsüng nung GPS ka lapoktsüba, GMS Chungtiayimsen school building nung primary section yanglushitsü aser school building meketa atsü atsütsü indang onüktem liasü.
SDPDB-isa Merangmen nung police out post tasen ka lapoktsü atema sorkar dangi abentsü telemtetba agi.
Taruba SDPDB senden nung “Mangkolemba Vision 2041” atema department ajaki tebilembatem tezüluba nung agütsütsü atema SDPDB Vice Chairman & ADC-i senden nung adenertem dang ashi.
December 2016 nung Mangkolemba ADC Headquarter küm 25 ajungba jubileemung nung “Mangkolemba Vision 2041” sayatsü.
Senden nungsa Border Magistrate, Tsurangkong-i Mangkolemba sadar aser Merangmen Circle nung SDPDB züngsemtemi yimtsüngtem sema senzüba osang lemsatep.