Naga Hoho-i RSS-aitsür; AFSPA agientsü akhanger

Dimapur, June 7 (TYO) : Naga nunger mulungtet teloktem aser human rights activist temi mepishia aruaka, India sorkari North East nung aser Naga nunger aliba tesemtem nung Armed Forces (Special Powers) Act 1958 (AFSPA) magienba atema jashir, ta Naga Hoho sangdong ka nung metetdaktsü.
Ozüng tesashitem yangluba sülen nungi Centre nung yimten telok balalai sorkar yimsü süa arudang parnoki AFSPA atema ola madoker. Ano, tanü-asüng RSS-i North East aser Jammu & Kashmir nung AFSPA maneni alitsü pusema nungitba osang angashidang Naga nungertem kanga aoksaogo, kechiyong alima nung democratic linük tulutiba nung iba ama ozüng tesashi ayutsü nüngdak mali, ta Media Cell, Naga Hoho sangdong nung metetdaktsü.
RSS-i AFSPA pusema nungitba ajanga parnoki Naga nunger taginüba sempaba kuli sayur. Naga nungeri raraba ya kiralongraba mesüra linük nungi balaka razüka aoba inyakyim ama mebilemtsüla, ta Naga Hoho-i RSS dang metetdaktsür, kechiyong India sorkari Naga yimten puti otsü balaka aser pei sasa yimsüsüa alitsüji nübortem dak dang keta lir ta agizükogo.
India sorkar aser Naga nungertemi kati ka akhümtsübutepa yimsüsüba tashi lemdangtsü aser India sorkar o Naga nunger tsüngda tesentaktep tajung ayutsü atema mulungtepogo. Anungji, RSS aser India nung lennirtemi chichiba tangatetbaji metettsüla. Indian Army-i küm 60 dak tema Naga nunger reshikangshia arur aser parnoki tila tanurtem aser kaketshirtem daka taochi mesayur. Tang tesüsa atalokba lendongtem nung Assam Rifles-i school tanurtem aser public tem maochi tepsetogo, ta Naga Hoho sangdong nungsa shia lir.
India sorkar aser Naga nunger tsüngda yimjung maparen teinyakdak lir aser ibaji August 3, 2015 nü Framework Agreement ajanga kuli sayur. Naga nunger aliba tesemtem nung tang tensa junga dang lir aser telok anatsülen tsüngda temulung lemtep aser tamang katettsü atema ozü lima nungi tekaratiba nung AFSPA agientsüla ta Naga Hoho-i bilemer.
Naga Hoho-isa Manipur nungi civil rights activist, political activist aser “Iron Lady of Manipur” ta ajala, Irom Sharmila pusema nungiter.
November 2, 2000 anogo nungi Irom Sharmila-i Armed Forces Special Powers Act (AFSPA) agientsü atema takhangba agüja lumia lungkak aiter aser iba ya alima nung lumia lungkak aitba rongnung talangtiba lir, ta sangdong nungsa shia lir.
Naga Hoho-i nisung ajak dang Armed Forces Act ajanga takoksa aser khuret bener arutsübatem kanga junga shisadangtsü aser iba Act agientsü atema külemi ola adoktsü ayongzüker, ta Media Cell, Naga Hoho sangdong nungsa mepishia metetdaktsü.