IS aser par telok pusemer ajunga samatsütsü: Assad

Cairo, June 08 (Agencies): Iraq aser Syria na nung lendong kanga sashia atalokdaktsüba kiralongrar telok tetsüti, Islamic State (IS) aser par telok pusemer ajunga meshi meshia samatsütsü tenangzükba olen ka Syria Tir, Bashar al-Assad-i yashi, Mongolbar nü metetdaktsüogo.

Syria’er tasenba parliament yimsüsürtem den onük jembidang Assad-i iba tenangzükba olenji nenshia metetdaktsü.

Ano, kidangsüa aliba Turkey Tir, Recep Tayyip Erdogan-i IS telok pusema nungiter ta shia, Assad-i Erdogan-a aija liasü.

“Syria mitkartemi takok angutsü dakalaka tanga lenmang kecha mali,” ta shia, par mitkartemi Syria lushi ajunga IS aser par telok pusemba kiralongrar ket nungi tanaben agishitsü alizüng ayuba osang ka pai metetdaktsü.

Ano, Syria pusemer, Russia, China, Iran aser Lebanon nung tentetba Hezbollah telok dang pelaba olen ka Assad-isa metetdakja liasü.

Bendang linüktemi pei jurila tajangzük angutsü nükjidong nung Syria nung alir kin balala rong nung mangatettep adokja tongpang kanga sashia raradaktsür,” ta shia, Assad-i bendang linük lenirtema aitsüogo.

Ano, Syria sorkar aser sorkar anemertem na tsüngda taküm February ita agiba yimjung tezüngzüktep raksatsütsü asoshi United States-i inyakba olen ka pai metetdakja liasü.

“Syria sorkari United Nations (UN)’er Syria envoy, Stafan de Mistura den dang ajurua jembitsü nangzüka liasü,” ta shia, UN-i ayonger Switzerland kübok Geneva nung taküm April ita amenba yimung senden nunga par Syria sorkari shilem agitsü memelungi aliba olen ka Assad-isa metetdaktsü.