Railway Union-i July 11 nungi tenzüka longkak aittsü amokmerener

New Delhi, June 08 (Agencies): Pension scheme tasenba aser 7th Pay Commission recommendation densema takhangba balala agüja Railway union temi July 11 nü nungi tenzüka linük tesem ajaklen longkak aitsü ayongzükogo.

All-India Railwaymen’s Federation (AIRF) General Secretary, S Gopal Mishra-i, “July 11 anepdang 6:00 ako nungi tenzüka mapang telatet makai longkak aittsü atema asüng onoki railways nem osang metetdaktsütsü,” ta ashi.

Ita trok tejaklen takhangba balala agütsübatem sorkari sentoka toktsür, anungji longkak aittsü, ta paisa ashi.

Railways nung inyaker nisung lakh 13 shi longnak aitra ibaji ajanga train senzüba nung kongshia linük nüburtemi timtem ajangshitsü.

Railway union temi pension scheme tasenba aser 7th Pay Commission reprangshitsü aser mapa tazüng aliba nung nisung jenti anioktsü densema takhangba balala agüja lir.

Longkak aittsü ayongzükba pusema National Federation of Indian Railwaymen General Secretary, M Raghavaiah-ia, “July 11 nungi longkak aittsü atema ayongzükba osangji asüng onoki railways nung zonal general manager ajak nem metetdaktsütsü,” ta ashi.

Raghavaiah-isa, union anapronglia longkak aittsü ayongbaji pusemer, ta ashi.

“Onok takhangbatemji kasa aser onok senteper sorkari benokba anti-labour laws anema longkak aittsü,” ta paisa shisem.

7th pay Commission report dak sentakba nung Mishra-i, “Ita shia minimum wage ji sen 18,000 nungi 26,000 kümtsütsüla,” ta ashi.