Lanurtem election-i aitsüla

Nagaland nung tetsübutsü, tatendentsü aser yiar ama kümer inyaktsüba mapa kaji election-i aitsüba mapa ya ka asütsü. Sen crore ishika makarbo election-i maitsüla, yi majemerbo election-i maitsüla, injang bomb amshia nisung amokmeren mesüli süra maitsüla aser adoker külena ozüng alema meinyaktettsü purtembo maitsüla. Itemjibo tanü tensa Nagaland nung election-i aitsü metemsü, parnokji tasümait, lapilarartem asütsü. Election-i kechiba inür ? Adokra kechi inyaktsütsü (?) ta shingaia election-i inürtem dang masüngdangtsü saka na sen kwi kar ? Kü nem, ozü nem aser onok telok nem sen kwi agütsütsü (?) ta dang asüngdangtsü. Aji oda, yarinertemia kü nem sen lakh ishika den prangpong injang teperi kua ta dang ashitsü. Ibayongji, tanü tashi Nagaland election nung sen makar aser tashiyim amshitsü memulunger lanurtem election-i meitetter. Ajisüaka lanurtemi iba tensa tiaji memelenshitet tashi tapu aika jembiyonga asen lima tajungba makümtsü. Joko, koda masü yimten nung ajemokadoker asünungji akokyonga makokyonga aser adokyonga madokyonga teinyakdak pur yimsüsürtemi pei ashi akok tashi merangdanger anener. Ano, sorkar mapa nung alirtema mapa nung alidang rongsen chikujungaka bendentetra, ibaji amshia election-i air. Iba tsüngda nungji bilemyonga lanurtem maitteter. Tanü lanur kar yimten nung shilem agiteta lira, itemjibo tasenpurtem masü saka tsürabur senmang amanger amai aitba purtem asütsü, anungji tenüng melen dang ashi yimten yimsüsübaren nungbo temelenshi magütsütetter. Aji oda, tanü tensa Nagaland nung electioni airtem yabo shisamaka yiar amai dang bilemer. Ajisüaka, asenoki aginü maginü ta masü election ajanga asen lima raksar süra election ajanga dang yanglushitsü. Anungji, election ya tetsübutsü aser takoksatsü mapaji ta ser yutsür ajentsüba mapa ka masü saka tonga orr yanglushitsüba mapa ka lir. Atangji, teka nung kecha maka ser yimten nung shilem magitettsü. Ajisüaka, yimten nung shilem agitsübaji sen tuluba masü saka tangatetba, nübor meimba aser alima asoshi mangdang aliba shisatsü aser temulungjang tuluba lir. Tangatetba melira, nübortem meimba agi masü rongsem meimba agi aser alima asoshi mangdang aliba agi masü saka pei ulutsü bilema election-i air asütsü, saka itemji tazüngla nung atemtsü. Iba tangatetba nung tanü lanurtemi raktepa election-i aitsüla. Item lanurtem jagi sen agi vote malitsü, tiyazü jembia nisung memesüzüktsü, tashiyim mamshitsü, nisung tamajunger amshia kiralongraba mapa meinyaktsü saka pei lima aser pei nübortem asoshi kechi inyaktsütsü bilema ali, item  onüktemji jembia senzütsü. Item lanurtem jagi Election Commission-i latettsüba sen dang teimba meindoktsü. Aji oda, item lanurtemji election nungji madokyonga ojang saka pa mesüra la election-i aiba ajanga nübortem nem tangatetba ka mesüra anabo agütsütettsü. Aji oda, item lanurtem jagi mezüngyongi adoktsü meimlai nübortem nem tangatetba agütsütsü asoshi election-i aitsüla. Atangji, nübortemi angatetra adoktsü saka election nung madokyonga tamakok masü saka takok asütsü, kechiyong sen aser tashiyim amshia akokba takokba dang nungibo nübortem nem tangatetba agütsüba takokji tuluba asütsü. Asenoki matatetter dang ashi kodang nübortemi angatetdir, iba lima nung tashiji ajisa tuluba asütsü aser iba tangatetba nungi aruba temoatsü agi alima azükarutsü. Election-i aitsü sen bushiba aser prongpong injang bushiba sobaliba tamajung ya lanurtemi takoksa aser timtem arema election-i aiba ajanga aser election nung ochishia shilem agiba ajanga anendaktsütettsü. Ali kimong ajak yoktema electioni aibaji nübortem meimba shisatsü aser alima tenzüktsü nükjidong  masü saka rongsen agi rongsen melentsü lenmang bushirdangogo ta agatetdi. Iba jagi tanü Nagaland kangshir. Nagaland nung item tim masüba mapatem shibai aser shirnoki nokdangtettsü. Joko Naga nunger lanurtem aser talisa Aor lanurtem yabo election nung tangar sen semer tashiyim aser ochimashi mapa inyaker lanurbo masütsüla. Item lanurtemjiang candidate asütsüla aser parnoki tanü aser asüng Naga lima asoshi tebilemtsü onük aser shisa tasen benoka nübortem rongnung jembitsüla. Atangji, lanurbo lanur putu ta ajaki jembitsü saka lanurtem nem shingaia lanur putu maongkaji ang ta angatibo magütsütsü. Ibajibo terakteper meyong !