Naga Hoho-i Delhi Police aser Manipur aitsür

Dimapur, June 8 (TYO) : June 7, 2016 nü Manipur Bhavan, New Delhi kima nung Delhi Police aser Manipur Rifles-i lungkak aitertem dak tashiyim mapa inyakba kukua aitsür, ta Naga Hoho sangdong ka nung metetdaktsü.
Mongulbarnü Manipur Tribals’ Forum, Delhi (MTFD)-i Manipur Bhavan kima nung lisopurtem anema yangluba Bill asem magizükba aser ‘All Manipur political party’ züngsemtem dang mepelaba sayutsü atema ozüngi melaba ama lungkak aitba sentong ka agi.
‘All Manipur political party’ nung NPF ama tribal political party medensem mesüra olemtep nunga medendaktsü, anungji Manipur Chief Minister, Ibobi Singh-i All Political Party ta tenüng ambaji temenünütsüka lir, ta Naga Hoho-i sangdong nung shia lir.
Manipur Bhavan anükertem Manipur Rifles-i lungkak aitertem dak ki temalen nungi lung agi aonba aser Delhi Police o Manipur Rifles senteper lungkak aitertem yiruja tashiyim mapa inyakba den ano tetsür ana dak tim mesüi kongshiba inyakyimtem aitsür. Lungkak aitertem pur PCR van nung anir aodanga police-i parnok dak teka sangshiba ajanga tashiyim amshiba aser ozüng alema inyakba jungkai adoka sayur, ta Naga Hoho-isa metetdaktsü.
Iba tatalokba ya bushisüngdangtsüla aser aibelenertem ozüng tapet agi merenshitsüla. Ano, ozüngi melaba ama lungkak aitertem lock up aser jail tem nung puoka aliba chioktsüla aser teyirurtem nem medical expenses agütsütsüla, ta Naga Hoho-isa takhangba agütsü.