Nurse-tem anogo ka mental health training agi

IMDH nung mental health sentong ka nung shisalen sayur kati o jembiba aser shilem agirtem noksa nung angur. Mokokchung, June 09, 2016.

 Mokokchung, June 9 (TYO): Brihostibarnü nurse-tem atema District Mental Health dak sentakba nung anogo ka training IDSP Conference Hall, IMDH Mokokchung nung takok ngua kaogo, ta osang ka ajanga metetdaktsü.

Iba sentong nung IMDH nung Medical Superintendent, Dr. Medem-i nurse aser shilem agir ajak dang iba training nung adenba asoshi pelaba lemsatepba den iba sentong ya maongka ama agia angazüktsüla, ta ayongzük.

Mokokchung Dy. CMO Dr. Kibangkümba-ia mapang tatsüka agia jembidang, angazükba yabo tasoba mapang nungi tasünü tashi angazüktsü nüngdaker, koma angazükdir yamaji tajangzük angur, ta ashi. ‘Mental health’ ya kanga tongtibang aser ano kanga tebilemtsü maparen ka lir kechiyong akhidang nüburtemi iba ya memeteti liasü, ta paisa shisem.

Iba sentong nung shisalen sayurtemji- DIO (RCH& UIP) & District Nodal officer for Mental Health, Dr Temsuyanger, clinical psychologist, Azüngla aser tutor, Ajungla nungeri ‘mental health’ sentong dak sentakba nung onük balala bener arua tagitsü o aika lemsatepa liasü, ta kasa osang nungsa metetdaktsü.