Ozung shitak mamshitetba timtem

Nagaland school education department kübok inyaker tesayurtem karbo department ana asem nung inyaker lir ta angashibaji tesüngmangtsüka lir. Ano, iba osangjia tangari masü saka School Education minister-baiang sangdongbaji taoksatsüka aser tesasatsüka lir. Alima nung tamaren menden aika liaka tesayur menden aser mapajisa tematiba aser aküm takettiba, anungji tesayur ta asüba tenüng yabo memenendaktsüner. Aji oda, nisung kari danga ita sen achitsü kisüng atema tesayur inyaka lira meinyakang tajungba asütsü. Tesayur mapa nung yabo temoatsü aser atakatem na prongla dena lir. Tetezü, tesayur kari junga sayura pa mesüra la asoshi dang masü saka par senmangertem asoshia temoatsü saka junga mesayura atakatem alitsü. Ibaji mangatet ser nisung kari danga tesayur inyaktsü mapa angu ser nung yimbazüa inyaka lira majungtsü. Ano, shirnoksa tesayur mapa inyaktsü shim ser nung pei melen tangar yoka ali, parnok asoshisa tamajungtiba kechiyong ibajibo tarutsü lanu putu ashioktsür asütsü. Item ama mapatemjibo ozüngi memelaba dang masü saka meimchir shisatsü adeneribo meinyaktsüla. Atangji, school education department kübok tesayurtem shimba maparen nung timtem, meshitak aser tamakok tapu aika angashia aruogo. Aser ano tang tesayurtem karbo ano tanga department nunga inyaker ta angashiba osang jagi department dang masü saka school tanurtem mulungjang dena menendaktsür. Item ama meshitak aser ochimashi mapatem jagi tanurtemi tesayurtem dak temulung malem adokdaktsür. Ano, ibajisa tamajungtiba. Item ama ozüng alema meshitaki inyakba mapatemjibo putetli ozüngi melaba ama tapet mapa inyaktsüla. Taibo putet saka timi memetongshitsütetbajia kasasa tai asütsü. Aji oda, tesayurtem rongnung nisung kar department ana asem nung inyakbabo putet saka parnok nem June 30 tashi nung koba department nung inyaktsüar shimtetang ta metetdaktsübaji tim inyakyim masü. Sorkar inyakyim shitak inyakdi süra parnok nemji tamasa tasüngdangba ‘Show cause notice’ agütsütsüla aser ajiser külenang ozüng nung aliba ama inyaka aotsüla. Nisung ka sorkar mapa ana asem nung külemi inyakbaji tim masü,  anungji pai mesüra lai agiyonga aruba ita sen dena menoker külenang ano temerenshi angutsü langa lir. Tanü Nagaland timtembaji nübortem majungba aser tenzükertemi shiktak meinyakba kisüng masü saka ozüng yanglur yimsüsürtemi mapa shitak meinyaker. Aji oda, sorkar tenzükertemi aibelenbaji peisasa metongshitsü taochi agütsüba sorkarjibo Nagaland sorkar dang asütsü. Ibayongji, Nagaland nungbo ochimashi mapa agi sünga liaka, sorkar tenzükertem apuba aser mapa nungi anentsüba osang kangabo mangashir. Ashiko, ochimashiba mapa atema merenshidi asübo sorkar tenzükerbo ka danga manüngtsüba asüba agi memerenshir aser memetongshitsür asütsüa akok. Ajisüaka, sorkari dena ochimashi mapa inyakertem nem kenyongi pa mesüra la tenünga metetshi miimbanga yur taochi sayu nungbo, Nagaland  sorkar office nung tiyazü aser ochimashi mapatem agi asüngtsü aser asenoki tang 2030 Nagaland mangdang indang jembiyonga, iba küm matongdang Nagaland nung yimten inyakyim ajak chirepadoker alitsü, Idangjibo, sorkar office ajak nung pei sünütsü asütsü. Iba ama tensa tia kati asenok tonga marudang tanü asenoki nokdangadoktsüla. Atangji, kechi mapa nung südir süaka shitak inyaktsübaji tasak kechiyong shitak inyaktsü asoshi tamasa asen shitak alitsüla. Shitak inyaktsü asoshi lenir kati ozüng paidoker inyaktsü memerangtsüla. Shitak inyaktsü asoshi lenir kati sübokrem magi aremtsüla. Shitak inyaktsü asoshi lenir kati koba tajungba ta masü saka kechi shitakba ta asüba nung teti bilema inyaktsü tim. Shitak inyaktsü asoshi rongsen nem pei tangatetba tajung mekokdaktsütsüla. Aji oda, kechi shitak aji inyakra ajak shitak asütsü. Tanü Nagaland ajungtsü asoshi kechi shitak, ibaji inyaker nisung ishika nüngdaker.