Stuttgart Open: Federer 3 buba round-i iogo

Stuttgart, June 09 (Agencies): Switzerland nunger tennis asayar mongin, Roger Federer-i America nunger Taylor Fritz madak takok ngua, Stuttgart Open tennis asayamong tebur singles 3 buba round-i tanü, Brehostibar nü iogo.

Teberem tashidak adokba ajanga ita ka shi tennis masayateti süidaktsüsang, Federer-i tanü points 6-4, 5-7, 6-4 ngua, Fritz 2 buba round nung tsükdaktsü.

Federer-i points 4-2 ngua temaba jenjang nung asayadang yashi tzünglu kanga sashia aruba yong par asayaji tanü ang tembanga asaya liasü.

Tebur World No.3, Federer-i 2001 küm asayaba sülenbo tan mezüngsüa Stuttgart asayamong nung shilem agir lir.

Arishi küm 34 tain Federer-i par taruba asaya Germany nunger Florin Mayer den asayatsü lemzükogo.

Ano külen, Austria nunger Dominic Thiem-i points 7-6 (7/3), 7-6 (7/2) agi Australia nunger Sam Groth madak takok anguba sülen Russia nunger Mikhail Youzhny den quarterfinal asayatsü jenjang nguogo.

Tan asayamong nung 4 buba jenjang abener, France nunger Gilles Simon-ia points 6-4, 4-6, 6-2 ngua Germany nunger Jan-Lennard Struff tsükdaktsüba osang jangjaogo.